Chégrasiz muxbirlar teshkilati xitayni ilham weli qatarliq muxbirlarni qoyup bérishke chaqirdi

Muxbirimiz erkin
2018.09.28

Chégrasiz muxbirlar teshkilati jüme küni bayanat élan qilip, xitay da'irilirini ilham weli, memtimin obul, jür'et haji, mirkamil ablimit qatarliq “Shinjang géziti” we “Shinjang déhqanlar géziti” ning bash we mes'ul muherrirlirini we bölüm bashliqlirini qoyup bérishke chaqirghan. Mezkur teshkilatning ilgiri sürüshiche, ularning qolgha élinish sewebi külkilik iken.

Xitay da'iriliri bu yil 8‏-ayda “Shinjang géziti” ning mu'awin bash muherriri ilham weli, bölüm bashliqliri memtimin obul, jür'et haji we “Shinjang déhqanlar géziti” ning bash muherriri mirkamil ablimitni “Ikki yüzlimichilik” bilen eyiblep qolgha alghan.

Chégrasiz muxbirlar teshkilatining ilgiri sürüshiche, xitay da'iriliri “Ikki yüzlimichi” dégen bu müjmel atalghuni qollinip, xitay hökümitining siyasitige yoshurun naraziliq bildürgen shexslerni jazalimaqta iken.

Bayanatta, chégrasiz muxbirlar teshkilati sherqiy asiya bölümining mes'uli sidrik ele'i'ani “Ikki yüzlimichilik dégen bu jinayetning keship qilinishi, peqet xitay da'irilirining bu zhurnalistlarni tutqun qilishta qolgha chiqqudek bir seweb yoqluqini namayan qilidu” dégen.

Bayanatta tekitlinishiche, xitayning bu rayondiki musulman türkiy xelqlerge qarita élip barghan keng kölemlik sistémiliq basturushi herikiti nurghun Uyghur zhurnalistliri we ularning a'ile tawabi'atlirining téximu köplep xalighanche tutqun qilinishigha yol achqan.

Chégrasiz muxbirlar teshkilati yéqinda élan qilghan “2018‏-Yilliq dunya axbarat erkinlik körsetküchi” de xitayni 180 dölet ichide axbarat erkinliki eng nachar döletlerning biri, dep élan qilip, 176‏-orun'gha tizghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.