“Chégrasiz muxbirlar teshkilati” ning 2022-yilliq doklatida xitaydiki teqip alahide tenqidlen'gen

Muxbirimiz eziz
2022.05.03

Bash shitabi fransiyediki “Chégrasiz muxbirlar teshkilati” ning 2022-yilliq doklati 3-may küni élan qilin'ghan bolup, bu yilliq doklatta xitaydiki axbarat erkinlikining téximu arqigha chékin'genliki türlük sanliq melumatlar arqiliq tepsiliy yorutup bérilgen.

2022-Yilliq doklatta körsitilishiche, xitay hökümiti dawamliq halda axbarat erkinliki boyiche eng nachar tizimliktiki eng töwen nomurni alghan döletler qatarida tilghan élin'ghan. Shuning bilen birge ötken bir yil ichide xitayda axbarat sahesidiki muxbirlar we ziyaliylarning tutqun qilinish ehwalida téximu zor derijidiki örleshning barliqqa kelgenliki, yene kélip xitay hökümiti tutqun qilghan, dep qariliwatqan muxbirlar we ziyaliylarning mutleq köp qismi Uyghur diyarida ikenliki alahide tekitlen'gen. “Chégrasiz muxbirlar teshkilati” sherqiy asiya bölümining mes'uli sédrik alwyani (Cedric Alviani) bu heqte söz qilip: “Xitaydiki axbarat erkinlikining bu qeder chékinip kétishi heqiqetenmu ademni heyran qalduridu,” dégen.

Mezkur doklatta tilgha élin'ghan mesililer ichide alahide diqqet qilishqa tégishlik bir nuqta, xitayche shekildiki axbaratni teqip qilish qilmishining dunyagha kéngiyishi bolghan. Doklatta éytilishiche, xitay hökümiti özlirining siyasy we iqtisadiy jehettiki tesiridin paydilinip, asiyadiki özige qoshna döletlerning axbarat sahesinimu kontrol qilishqa urunmaqta iken. Buning bilen tayland, kambodzha qatarliq bir qisim döletler xitayning biwaste tesiride téximu hakimmutleq bolghan shekiller arqiliq axbarat sahesini kontrol qilishni bashliwetken. Hindistan, sirilanka, filippin qatarliq döletlerdiki hökümetni tenqidleshke jür'et qilghan axbaratchilargha hujum qilish weqeliri bolsa téximu köpeygen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.