Уйғур диярилиқ челишчи хитайда өткүзүлгән әркин челишиш мусабиқисидә чемпийон болди

Мухбиримиз әркин
2018.05.28

Уйғур дияридин кәлгән бир яш челишчи йеқинда хитайниң шәндуң өлкисидә өткүзүлгән хитайниң 20 яшлиқлар мәмликәтлик әркин челишиш түриниң ләвһә талишиш мусабиқисидә чемпийон болған.

Мусабиқә 24‏-май күни хитайниң шәндуң өлкисидики лявчең шәһиридә өткүзүлгән. Мусабиқидә 20 яшлиқ қабила арқа-арқидин 4 рәқбини йеңип, 92 килограмлиқлар бойичә чимпийонлуққа еришкән. Мусабиқидә уйғур дияридин кәлгән йәнә икки нәпәр челишчи айрим-айрим күмүш медал вә мис медалға еришкән.

“шинҗаң әтигәнлик гезити” ниң хәвиридә баян қилинишичә, челишчилардин турсун 70 килограмлиқларниң мусабиқисидә күмүш медалға, рустәм рахман 92 килограмлиқларниң мусабиқисидә мис медалға еришкән. Бу қетимқи мусабиқә хитай һөкүмити уйғур зиялийлирини тиҗарәтчилирини, диний затлирини, язғучи-сәнәткарлирини вә тәнтәрбийә чолпанлирини тутқун қилип, уларни кәң көләмдә йиғивелиш лагерлириға қамаватқан бир мәзгилдә өткүзүлгән.

Кишилик һоқуқ тәшкилатлириниң илгири сүрүшичә, нөвәттә аз дегәндә бир милйон уйғур бу лагерларда тутуп турулмақтикән. Хитай һөкүмитиниң бу йил 2‏-айда җяңсу суниң командисида топ ойнайдиған атақлиқ уйғур потбул чолпини ерфан һезимни дөрбилҗиндә тутқун қилип, йиғивелиш лагериға қамиғанлиқи ашкариланған иди. Уйғур тәшкилатлири хитайниң бу лагерларда тутқунларни өз миллий кимлики, мәдәнийити вә диний етиқатидин ваз кечишкә мәҗбурлап, “мәдәнийәт қирғинчилиқи” елип бериватқанлиқини илгири сүрүп кәлди. Шәндоңда өткүзүлгән юқириқи мусабиқигә уйғур дияридин 8 нәпәр челишчи қатнашқан.

“шинҗаң әтигәнлик гезити” ниң хәвиридә қәйт қилишичә, челишчилар әтритиниң тренери давут нур чемпийон қабилани тонуштуруп, “у тәҗрибә-савақларни хуласилашқа маһир. Мәшиқләрдә әтрәт тиренери билән техникилиқ деталларда маслишалайду. Униң көңүл қоюши вә тиришчанлиқи уни чимпийонлиқ сәһинисигә елип чиқти,” дегән

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.