Uyghur diyariliq chélishchi xitayda ötküzülgen erkin chélishish musabiqiside chémpiyon boldi

Muxbirimiz erkin
2018-05-28
Share

Uyghur diyaridin kelgen bir yash chélishchi yéqinda xitayning shendung ölkiside ötküzülgen xitayning 20 yashliqlar memliketlik erkin chélishish türining lewhe talishish musabiqiside chémpiyon bolghan.

Musabiqe 24‏-may küni xitayning shendung ölkisidiki lyawchéng shehiride ötküzülgen. Musabiqide 20 yashliq qabila arqa-arqidin 4 reqbini yéngip, 92 kilogramliqlar boyiche chimpiyonluqqa érishken. Musabiqide Uyghur diyaridin kelgen yene ikki neper chélishchi ayrim-ayrim kümüsh médal we mis médalgha érishken.

"Shinjang etigenlik géziti" ning xewiride bayan qilinishiche, chélishchilardin tursun 70 kilogramliqlarning musabiqiside kümüsh médalgha, rustem raxman 92 kilogramliqlarning musabiqiside mis médalgha érishken. Bu qétimqi musabiqe xitay hökümiti Uyghur ziyaliylirini tijaretchilirini, diniy zatlirini, yazghuchi-sen'etkarlirini we tenterbiye cholpanlirini tutqun qilip, ularni keng kölemde yighiwélish lagérlirigha qamawatqan bir mezgilde ötküzülgen.

Kishilik hoquq teshkilatlirining ilgiri sürüshiche, nöwette az dégende bir milyon Uyghur bu lagérlarda tutup turulmaqtiken. Xitay hökümitining bu yil 2‏-ayda jyangsu suning komandisida top oynaydighan ataqliq Uyghur potbul cholpini érfan hézimni dörbiljinde tutqun qilip, yighiwélish lagérigha qamighanliqi ashkarilan'ghan idi. Uyghur teshkilatliri xitayning bu lagérlarda tutqunlarni öz milliy kimliki, medeniyiti we diniy étiqatidin waz kéchishke mejburlap, "Medeniyet qirghinchiliqi" élip bériwatqanliqini ilgiri sürüp keldi. Shendongda ötküzülgen yuqiriqi musabiqige Uyghur diyaridin 8 neper chélishchi qatnashqan.

"Shinjang etigenlik géziti" ning xewiride qeyt qilishiche, chélishchilar etritining trénéri dawut nur chémpiyon qabilani tonushturup, "U tejribe-sawaqlarni xulasilashqa mahir. Meshiqlerde etret tirénéri bilen téxnikiliq détallarda maslishalaydu. Uning köngül qoyushi we tirishchanliqi uni chimpiyonliq sehinisige élip chiqti," dégen

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet