Chén chu'en'goning Uyghur élida “Milletler mesilisini junggoche uslubta hel qilishni dawamlashturush” nutqi diqqet qozghidi

Muxbirimiz irade
2019.04.04

“Xitay xewerler tori” ning xewer qilishiche, 2-aprél seyshenbe küni ürümchide Uyghur aptonom rayonluq partkomning sékrétari chén chu'en'goning biwasite riyasetchilikide “Milletler ittipaqliqini ilgiri sürüsh söhbet yighini” échilghan.

Mezkur yighinda chén chu'en'go milletler ittipaqliqini kücheytip, Uyghur élida uzun muddetlik eminlikni berpa qilishni tekitligen. U sözide “Buning üchün aldi bilen rayondiki milletler munasiwitini yaxshi igileshni, milletler mesilisini junggoche uslubta hel qilishtin ibaret toghra yolda qet'iy méngishni, partiyening milletler siyasitini emeliyleshtürüshni” tekitligen.

Xitay hökümiti yéqinqi 3 yildin buyan Uyghur élida 2 milyondin oshuq Uyghur we qazaq qatarliq yerlik milletlerni lagérgha qamighandin sirt rayonni éghir derijide qamal astigha alghanliqi melum. Xitay hökümiti xelq'araning bu heqtiki tenqidlirige qayturghan jawabida özlirining dunyagha omumyüzlük tehdit séliwatqan térrorluq we radikalliqni xitaygha xas uslub bilen yoqitiwatqanliqini ilgiri sürgen we hetta dunya döletlirini xitaydin ülge élishqa dewet qilghan idi.

Chet'ellerdiki Uyghur közetküchiler chén chu'en'goning “Milletler mesilisini junggoche uslubta hel qilishni dawamlashturush” sözini tilgha élishi emeliyette rayondiki lagér tüzümi we qattiq qolluq siyasetlerning izchil dawam qilidighanliqidin bésharet béridighanliqini tekitlimekte.

Yuqiriqi xewerdin qarighanda, chén chu'en'go sözide yene “Az sanliq milletlerning örp-adetlirige hörmet qilish we qoghdash, ularning dölet bashqurushqa qatnishish hoquqlirigha kapaletlik qilish, öz milliy til-yéziqini ishlitishige kapaletlik qilish, milliy ayrimichiliq we ularning hés-tuyghulirini zédileydighan ish-heriketlerge qet'iy qarshi turush” ni tekitlep ötken.

Közetküchilerning qarishiche, uning rayonda ijra qiliniwatqan esheddiy siyasetlirige pütünley zit kélidighan bu sözliri xelq'arada yéqindin buyan küchiyiwatqan tenqidlerge qarshi xelq'ara jem'iyetning közini boyash üchün qilin'ghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.