19-Қурултайда "тартуқланған" чен чүәнго қурултай роһини өгиниш һәрикити қозғиған

Мухбиримиз ирадә
2017-10-26
Share

Уйғур аптоном районлуқ парткомниң секретари чен чүәнго уйғур елида дәрһал 19-қурултай роһини өгиниш һәрикити қозғашни пиланлиған.

Бу қетимлиқ қурултайда хитай компартийәси сиясий бюросиниң әзалиқиға тәйинләнгән чен чүәнго қурултай йепилғандин кейин "шинҗаң вәкиллири омумий йиғини" ни чақирған. У йиғинда "19-қурултай роһини өгиниш вә тәшвиқ қилиш һәмдә уни әмәлийләштүрүш долқунини тездин қозғаш керәк, уни муһим сиясий вәзипә қилип, ‹җуңго арзуси' ниң шинҗаң сәһиписини яхши пүттүрүш керәк," дегән.

Униң сөзигә қариғанда, уйғур елидики партийә әзалири вә кадирлар муддәткә вә түркүмгә бөлүнүп мәхсус қурултай роһи бойичә тәрбйәлинидикән. Қурултай роһи уйғур елиниң җай-җайлиридики карханилар, йеза-кәнтләр, органлар, мәктәпләр вә мәһәллиләрдә лексийә сөзләш яки таратқуларниң васитиси арқилиқ кәң тәшвиқ қилинидикән.

Чәтәлләрдики көзәткүчиләр, уйғур диярини қаттиқ қоллуқ билән идарә қилғанлиқи үчүн бу қетимлиқ қурултайда ши җинпиң тәрипидин "тартуқланған" чен чүәнгониң бундин кейин уйғур елини техиму қаттиқ тәдбирләр билән идарә қилидиғанлиқини мөлчәрлимәктә.

Чен чүәнгониң хитай компартийәсиниң сиясий бюро әзалиқиға тәйинлиниши уйғур ели вәзийитигә йеқиндин диққәт қилип келиватқан чәтәллик көзәткүчиләрниңму диққитини қозғиди. Улар тивиттердики инкаслирида "бу хитай компартийисиниң қаттиқ қоллуқ билән башқурғучиларни мукапатлайдиғанлиқиниң әң типик бир мисали," дәп язған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт