Chén chüen'go Uyghur élida turushluq xitay armiyesi we qoralliq qisimlar bilen körüshkende "Urushqa teyyarlinish we térorluqqa qarshi turush" ni tekitligen

Muxbirimiz irade
2021-02-11
Share

Uyghur aptonom rayonluq partkomning sékritari chén chüen'go Uyghur élida turushluq xitay armiyesi we qoralliq qisimlar bilen körüshkende "Térorluqqa qarshi turush we muqimliqqa kapaletlik qilish" ni tekitligen.

Xitayning "Tengritagh" torining xewiridin melum bolushiche, 8-féwral küni chüshtin kéyin Uyghur aptonom rayonluq partkomning sékritari chén chüen'go qatarliqlar xitayning chaghan bayrimi munasiwiti bilen Uyghur élida turushluq xitay azadliq armiyesi we qoralliq saqchi qisimi wekilliri bilen körüshken. Chén chüen'go shu kündiki sözide xitay armiyesi we qoralliq saqchi qisimlarning uzaq muddetlik eminlikini qoghdash yolidiki xizmetlirini yuqiri bahalash bilen birge bundin kéyin yenimu kücheytishini telep qilghan.

"Tengritagh" torining xewiride mundaq diyilgen: "Chén chüen'go shinjangda turushluq xelq azadliq armiyesi we qoralliq saqchi qisim ofitsér-eskerlirining partiye merkiziy komitéti, merkiziy herbiy komitét we re'is shi jinpingning qomandanliqigha qet'iy boysunup, armiyeni qudret tapquzushini telep qildi. U yene diqqetni eskerlerni meshiqlendürüp urushqa teyyarliq qilish, ghelibe qilish iqtidarini omumiyyüzlük östürüp, agah signalini uzaqqiche yangritish, térrorluqqa qarshi turush, muqimliqni qoghdash éghir wezipisini zimmisige élishta ching turushni telep qildi. . ."

Xitay hökümitining Uyghur élida jaza lagérlirini qurup, nechche milyonlighan kishini erkinlikidin mehrum qiliwatqanliqi, yuqiri pen-téxnikaning yardimi bilen rayonda mutleq nazaretni ishqa ashurup, irrqiy qirghinchiliq qiliwatqanliqi xelq'arada küchlük tenqidke uchrawatqan bir shara'itta, Uyghur élida yene qandaqtur "Urushqa teyyarliq qilish we térorluqqqa qarshi turush" ni telep qilishi, küchlük naraziliq peyda qildi.

Chet ellerdiki Uyghur közetküchiliri buni xitay hökümitining Uyghur élidiki siyasetliridin waz kechmeydighanliqining ipadisi, dep qarimaqta we xelq'ara jama'etning xitaygha qaratqan bésimlirini yenimu kücheytishi kéreklikini tekitleshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet