Chén chüen'goning pénsiyediki “Uyghur rehberliri” din chaghanliq hal sorishi közetküchilerning diqqitini qozghidi

2021-02-17
Share

Xitay taratqulirining xewer qilishiche, chaghan kélish harpisida Uyghur aptonom rayonluqpartkom we hökümet emeldarliridin chén chüen'go, shöhret zakir qatarliqlar xitay memliketlik xelq qurultiyi da'imiy komitétining sabiq mu'awin bashliqi isma'il tiliwaldi, xitay memliketlik siyasiy kéngishining mu'awin re'isi ablet abdurisht qatarliqlarni yoqlighan we ularning chaghanliq bayrimini tebrikligen.

Chén chüen'go ulargha shi jinpingning “Shinjang siyasiti” netijiside qolgha keltürülgen “Parlaq netijiler” ni doklat qilghan we kelgüside shinjangda “Yéngi weziyet” barliqqa keltüridighanliqini bildürgen. Ularmu shi jinping rehberlikidiki partiye we hökümetning ghemxorluqigha rehmitini bildürgen hemde merkezning siyasitini pütün küchi bilen qollaydighanliqi we buning üchün özining barliq eqliy we küchini serp qilidighanliqini ipadiligen.

Bu yil xitay kompartiyesi qurulghanliqining 100 yilliqi bolup, bu munasiwet bilen xitay hökümiti “Péshqedem rehberler” din hal sorash bilenla qalmay, pasha ishandek péshqedem sen'etkarlarni otturigha chiqirip sözletken. Pasha ishan bu teshwiqat widiyosida xitay kompartiyesi qurulghanliqining 100 yilliqini tebrikligen we dutar chélip, “Azat zaman” naxshisini éytqan. Pasha ishan 50-yillardila “Azad zaman”, “Yasha junggo gongchendang” dégendek siyasiy naxshilarni éytqanidi.

Közetküchilerning qarishiche, kommunist xitay hökümiti chaghan bayrimi künliridimu öz teshwiqatini qoldin bermigen. Ular “Kompartiyege bolghan muhebbet” ning Uyghurlar arisida chongqur yiltiz tartqanliqini körsitish üchün pénsiyediki Uyghur emeldarliri we sen'etkarlirini qayta kötürüp chiqqan. Közetküchilerning ilgiri sürüshiche, xitay kommunistliri bu Uyghurlarning “Qizil qelbi” din guman qilsimu, emma qattiq bésim, qorqunch we siyasiy menpe'et aldida tiz pükken bu kishiler “Ikki yüzlimichi” qalpiqi kiyip qélishtin ensirep bolsimu, xitayning teshwiqatigha maslishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet