Чен чүәнгониң уйғур елидики "милләтләрниң өз ара юғурулуп кетиши" ни тәкитлиши диққәт қозғимақта

Мухбиримиз ирадә
2021-02-18
Share

Уйғур аптоном районилуқ парткомниң секритари чен чүвәнгониң чағанда уйғур елидики милләтләрниң өз ара юғурулуп кетиши вә районда аталмиш "җуңхуа мәдәнийити" ни бейитиш түрини алаһидә тәкитлиши диққәт қозғиди.

Хитайчә "тәңритағ тори" да тарқитилған хәвәрдин мәлум болушичә, чен чүвәнго 18-феврал күни уйғур аптоном районлуқ партийә комитетиниң кеңәйтилгән йиғинини чақирип, уйғур елиниң бундин кейинки хизмәтлирини орунлаштурған. У шу күндики сөзидә "милләтләрниң өз-ара юғурулуши" вә аталмиш "шинҗаңниң мәдәнийитини бейитиш түри" ни күчәйтип йолға қоюшни алаһидә тәкитлигән. Чәт әлләрдики көзәткүчиләр хитай даирилириниң бу пиланини очуқ-ашкара "мәдәнийәт қирғинчилиқи" йүргүзүш һәмдә уйғурларни ассимлатсийә қилип йоқитиш урунушидур, дәп қаримақта.

Чен чүәнго шу күнидики йиғинда мунуларни тәкитлигән: "милләтләр иттипақлишип бир аилә кишилиридәк болуши, һәрқайсий милләтләрниң өз ара арилишиши вә юғурулушини йәниму күчәйтиш керәк. ‹Җуңхуа миллити ортақ гәвдиси' еңини турғузуш, мәдәнийәт арқилиқ шинҗаңни бейитиш түрини күчәп йолға қоюш керәк, динни сотсиялистик җәмийәткә маслаштурушқа паал йетәкләш керәк."

Хитай даирилири лагерлар йолға қоюлған бир қанчә йилдин буян "мәдәнийәт арқилиқ шинҗаңни бейитиш" дегән нам астида уйғурларни хитайлаштурушни нишан қилған сиясәтләрни паал қанат яйдурмақта. Буниң җанлиқ испати болған бу йиллиқ чаған мәзгилидә уйғурларниң кәң көләмдә чағанни тәбриклигәнлики, хитайлар билән бирликтә җувава түгкәнлики, өйлиргә хитайчә панус асқанлиқи, той-төкүнлирини хитай әнәниси бойичә өткүзиватқанлиқи қатарлиқ иҗтимаий таратқуларда кәң тарқалған көрүнүшләр чәт әлләрдики уйғур җамаитини қаттиқ нарази қилған иди.

Уйғур аптоном районлуқ парткомниң секритари чен чүәнго шу күнидики сөзидә районда ассимлатсийә сиясәтлирини йәниму күчәйтишни тәләп қилипла қалмастин, бәлки йәнә "муқимлиқ тәдбирлирини бошаштурмаслиқни, һәтта уни давамлиқ күчәйтип узун муддәтлик әминликкә капаләтлик қилиш" ниму тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт