Chén chüen'goning Uyghur élidiki "Milletlerning öz ara yughurulup kétishi" ni tekitlishi diqqet qozghimaqta

Muxbirimiz irade
2021-02-18
Share

Uyghur aptonom rayoniluq partkomning sékritari chén chüwen'goning chaghanda Uyghur élidiki milletlerning öz ara yughurulup kétishi we rayonda atalmish "Jungxu'a medeniyiti" ni béyitish türini alahide tekitlishi diqqet qozghidi.

Xitayche "Tengritagh tori" da tarqitilghan xewerdin melum bolushiche, chén chüwen'go 18-féwral küni Uyghur aptonom rayonluq partiye komitétining kéngeytilgen yighinini chaqirip, Uyghur élining bundin kéyinki xizmetlirini orunlashturghan. U shu kündiki sözide "Milletlerning öz-ara yughurulushi" we atalmish "Shinjangning medeniyitini béyitish türi" ni kücheytip yolgha qoyushni alahide tekitligen. Chet ellerdiki közetküchiler xitay da'irilirining bu pilanini ochuq-ashkara "Medeniyet qirghinchiliqi" yürgüzüsh hemde Uyghurlarni assimlatsiye qilip yoqitish urunushidur, dep qarimaqta.

Chén chüen'go shu künidiki yighinda munularni tekitligen: "Milletler ittipaqliship bir a'ile kishiliridek bolushi, herqaysiy milletlerning öz ara arilishishi we yughurulushini yenimu kücheytish kérek. 'jungxu'a milliti ortaq gewdisi' éngini turghuzush, medeniyet arqiliq shinjangni béyitish türini küchep yolgha qoyush kérek, dinni sotsiyalistik jem'iyetke maslashturushqa pa'al yéteklesh kérek."

Xitay da'iriliri lagérlar yolgha qoyulghan bir qanche yildin buyan "Medeniyet arqiliq shinjangni béyitish" dégen nam astida Uyghurlarni xitaylashturushni nishan qilghan siyasetlerni pa'al qanat yaydurmaqta. Buning janliq ispati bolghan bu yilliq chaghan mezgilide Uyghurlarning keng kölemde chaghanni tebrikligenliki, xitaylar bilen birlikte juwawa tügkenliki, öylirge xitayche panus asqanliqi, toy-tökünlirini xitay en'enisi boyiche ötküziwatqanliqi qatarliq ijtima'iy taratqularda keng tarqalghan körünüshler chet ellerdiki Uyghur jama'itini qattiq narazi qilghan idi.

Uyghur aptonom rayonluq partkomning sékritari chén chüen'go shu künidiki sözide rayonda assimlatsiye siyasetlirini yenimu kücheytishni telep qilipla qalmastin, belki yene "Muqimliq tedbirlirini boshashturmasliqni, hetta uni dawamliq kücheytip uzun muddetlik eminlikke kapaletlik qilish" nimu telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet