Чен чүәнго уйғур аптоном райониниң сиясий-қанун саһәсидин "мутләқ садақәт" тәләп қилди

Мухбиримиз әркин
2021-03-15
Share

Уйғур аптоном районлуқ парткомниң секретари чен чүәнго сияси-қанун саһәсидикиләргә сәпәрвәрлик йиғини чақирип, улардин "мутләқ садақәт" вә "мутләқ ишәнчлик" болушни тәләп қилған. Униң тәкитлишичә, сияси-қанун саһәси барлиқ һәрикитидә ши җинпиң вә хитай мәркизи комитетиниң чақириқи вә қоманданлиқиға әмәл қилиши керәк икән. 14-Март ечилған "сияси-қанун қошуни тәрбийәсини тәртипкә селиш сәпәрвәрлик орунлаштуруши" намлиқ бу йиғин хәлқарада хитайниң "уйғур ирқий қирғинчилиқи" ни җавабкарлиққа тартиш чақириқи барғансери күчийиватқан мәзгилдә өткүзүлгән.

Мәлум болушичә, явропа иттипақи хитайниң уйғур елидики 4 нәпәр әмәлдари билән бир аппаратини җазалашни қарар қилған. Ройтерс агентлиқиниң 15-март бәргән хәвиридә, германийә ташқи ишлар министири хәйко маасниң дүшәнбә күни бу тоғрисида "бир келишим болиду, дәп қараймән" дегәнликини хәвәр қилди. 4 Әмәлдарниң ичидә уйғурларға қаритилған "ирқий қирғинчилиқ" ниң асаслиқ иҗрачиси, дәп қариливатқан чен чүәнгониң бар-йоқлиқи 22-март мәлум болиду. Ройтерсниң ейтишичә, дипломатлар имбарго қарариниң 22-март елан қилинидиғанлиқини билдүргән.

Чен чүәнго 14-марттики йиғинда сияси-қанун саһәсигә буниңдин кейин қандақ қилиш тоғрисида көрсәтмә бәргән. "шинҗаң гезити" ниң хәвиридә ейтишичә, чән чүәнго сияси-қанун саһәсидикиләрниң "өз-өзини тәкшүргәндә йошуруп қалмаслиқ, тәкшүргәндә қаттиқ қол болуш, җазалашта баш-ахири бирдәк болуш, кесәлни давалап адәмни қутқузуш, көп қисмиға тәрбийә берип, аз қисмини җазалаш сияси йөнилишигә капаләтлик қилиш" ни тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт