Chén chüen'go Uyghur aptonom rayonining siyasiy-qanun sahesidin "Mutleq sadaqet" telep qildi

Muxbirimiz erkin
2021-03-15
Share

Uyghur aptonom rayonluq partkomning sékrétari chén chüen'go siyasi-qanun sahesidikilerge seperwerlik yighini chaqirip, ulardin "Mutleq sadaqet" we "Mutleq ishenchlik" bolushni telep qilghan. Uning tekitlishiche, siyasi-qanun sahesi barliq herikitide shi jinping we xitay merkizi komitétining chaqiriqi we qomandanliqigha emel qilishi kérek iken. 14-Mart échilghan "Siyasi-qanun qoshuni terbiyesini tertipke sélish seperwerlik orunlashturushi" namliq bu yighin xelq'arada xitayning "Uyghur irqiy qirghinchiliqi" ni jawabkarliqqa tartish chaqiriqi barghanséri küchiyiwatqan mezgilde ötküzülgen.

Melum bolushiche, yawropa ittipaqi xitayning Uyghur élidiki 4 neper emeldari bilen bir apparatini jazalashni qarar qilghan. Roytérs agéntliqining 15-mart bergen xewiride, gérmaniye tashqi ishlar ministiri xeyko ma'asning düshenbe küni bu toghrisida "Bir kélishim bolidu, dep qaraymen" dégenlikini xewer qildi. 4 Emeldarning ichide Uyghurlargha qaritilghan "Irqiy qirghinchiliq" ning asasliq ijrachisi, dep qariliwatqan chén chüen'goning bar-yoqliqi 22-mart melum bolidu. Roytérsning éytishiche, diplomatlar imbargo qararining 22-mart élan qilinidighanliqini bildürgen.

Chén chüen'go 14-marttiki yighinda siyasi-qanun sahesige buningdin kéyin qandaq qilish toghrisida körsetme bergen. "Shinjang géziti" ning xewiride éytishiche, chen chüen'go siyasi-qanun sahesidikilerning "Öz-özini tekshürgende yoshurup qalmasliq, tekshürgende qattiq qol bolush, jazalashta bash-axiri birdek bolush, késelni dawalap ademni qutquzush, köp qismigha terbiye bérip, az qismini jazalash siyasi yönilishige kapaletlik qilish" ni tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet