Чен чүәнгониң сиясий қанун сәпәрвәрлик йиғинида қилған сөзи хитайниң уйғур районидики бастуруш һәрикитиниң техиму еғирлишидиғанлиқини көрсәткән

Мухбиримиз җәвлан
2021-08-18
Share

"шинҗаң гезити" ниң 17-авғуст бәргән хәвиригә қариғанда, уйғур аптоном районида сиясий-қанун хизмитини йәниму күчәйтиш үчүн 2-түркүм сиясий-қанун қошунини тәрбийәләш вә тәртипкә селиш сәпәрвәрлик йиғини ечилған.

Уйғур аптоном районлуқ парткомниң секритари чен чүәнго бу йиғинға қатнишип, "сиясий һушярлиқни өстүрүп, қанун-түзүмни иҗра қилиш салмиқини ашуруп, шинҗаңниң җәмийәт муқимлиқи вә узақ муддәтлик хатирҗәмликини әмәлгә ашуруш" һәққидә сөз қилған. У сөзидә йәнә бу мәқсәтни әмәлгә ашуруш үчүн "алди билән адәмләрни тәрбийәләш вә өзгәртиш һәрикитини яхши елип бериш, бөлгүнчиликкә, террорлуққа қәтий қарши туруш, аптоном районниң сиясий қанун қошунини йәнә бир қәдәм күчәйтиш, сиясий қанун муһитини йәнә бир дәриҗә яхшилаш керәкликини" ни билдүргән.

Чен чүәнгониң тәкитлишичә, сиясий-қанун қошунини тәрбийәләш вә тәртипкә селиш бир сиясий мәсулийәт болуп, буниңға уйғур аптоном районлуқ партком өзи баш болуп, түзәш вә тәртипкә селиш хизмәтлирини илгири сүридикән. Уйғур аптоном районлуқ партком сиясий-қанун комитети вә җайлардики сиясий-қанун орунлириниң парткомлири асаслиқ мәсулийәтни үстигә алидикән вә конкрет хизмәтлиридин җаваб беридикән. Уйғур аптоном районлуқ тәрбийәләш вә тәртипкә селиш рәһбәрлик гурупписиға әза орунлар бирликтә иҗраат елип баридикән.

Көзәткүчиләрниң қаришичә, чен чүәнгониң бу йиғинда қилған сөзи хитайниң уйғур районидики бастуруш сияситиниң техиму күчәйтилидиғанлиқини көрситидикән. Йәнә бир җәһәттин, бу йиғинниң ечилиши талибан күчлириниң кабулда өз ғәлбисини тәбриклигәндин кейинки вақитқа тоғра кәлгән болуп, хитайниң изчил һалда талибан билән һәмкарлишиш сигнали бәргинигә қаримай, талибан ислам әмирликиниң қурулушиниң кәлгүсидә уйғур районида күтүлмигән тәсир пәйда қилишидин әнсирәватқанлиқиниму көрситидикән. Әмма хитайниң асаслиқ ғәризи йәнила, талибан күчлирини баһанә қилип, уйғурларни "әсәбийлик" вә "террорлуқ" билән бағлап, уларни давамлиқ бастуруш вә қирғинчилиқ йүргүзүш икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт