Чен чуәнго җәмийәт муқимлиқи тәдбирлирини йәнә күчәйтишни тәкитлигән

Уйғур елидә мукәммәл бир сақчи дөлити бәрпа қилиниватқанлиқи илгири сүрүлүватқан бир мәзгилдә, уйғур аптоном райониниң партком секретари чен чуәнго районда йолға қоюлған җәмийәт муқимлиқи тәдбирлирини йәнә күчәйтиш һәққидә йолйоруқ бәргән.

Хитай компартийисиниң хәвәрләр торида көрситишичә, у, 18-авғуст бәргән көрсәтмисидә мәзкур күчәйтилгән муқимлиқ тәдбирлириниң “19-нөвәтлик партийә қурултийиниң ғәлибиси” вә “ши җинпиң ядролуқидики партийә мәркизий комитетини хатирҗәм қилиш” үчүн елинидиғанлиқини билдүргән.

У йәнә илгириму тәкитләп кәлгән “бир мәйдан хәлқ урушуши қилиш”, “алдин қол селиш” қатарлиқ ибариләрни йәнә ишләткән болсиму, әмма уйғур елидә муқимлиқ тәдбирлириниң йәнә күчәйтилидиғанлиқи һәққидә шәпә бәргән.

Хәвәргә қариғанда, униң аталмиш йолйоруқида пүтүн райондики “партийә, һөкүмәт, һәрбий, сақчи вә хәлқ зич иттипақлишип, террорлуққа қарши туруп җәмийәт муқимлиқини сақлайдиған полат истиһкам қуруп чиқишқа” чақирилған.

У мундақ дегән: “тиз ғәлибә қилиш идийисини йеңип, һәққанийәттин қайтмай, қаттиқ зәрбә бериш урушини мәңгү давам қилиш, толуқ ғәлибә қазанмай туруп, әскәр чекиндүрмәслик керәк.”

Уйғур елидики аталмиш муқимлиқ тәдбирлириниң мисли көрүлмигән дәриҗидә күчәйтилгәнлики хәвәр қилиниватқан мәзгилдә чен чуәнго юқирида бәргән йол йоруқниң йәнә немидин дерәк беридиғанлиқи һазирчә намәлум.

Һалбуки, бу “йолйоруқ” чен чуәнго уйғур райониға башлиқ қилип йөткәлгән 11 ай ичидә 80 миңдин артуқ сақчи яки бихәтәрликкә аит хизмәткә елан чиқирилғанлиқи, наһийә-наһийәләрдә йепиқ тәрбийиләш мәркәзлири қурулуп аталмиш гуманлиқ уйғурларниң қамалғанлиқи, йол еғизлирида тәкшүрүш понкитлири вә сақчи боткилири тәсис қилинип, уйғурларниң қаттиқ тәқиб астиға елинғанлиқи хәвәр қилинған мәзгилгә тоғра кәлди.

Бу һәқтә тохталған германийәдики явропа мәдәнийәт вә илаһийәтшунаслиқ университети тәтқиқатчиси адриян зенз: “бу, өз нөвитидә йәнә бир сақчи дөлити бәрпа қилишниң шәртлирини һазирлаш билән биваситә мунасивәтлик” дегән иди.