7 Kadir “Chén chu'en'go üzündiliri” ni yadlap bérelmey jazalan'ghan

Muxbirimiz jüme
2017.10.14

Radiyomizning xewer qilishiche, Uyghur élining altay wilayitide 7 neper xitay emeldari chén chu'en'goning üzündilirini yadlap bérelmigenliki üchün jazagha tartilghan.

Radi'omiz gu'angdung bölümining altay wilayiti bu heqte chiqarghan uqturushtin neqil élip körsitishiche, yuqirida wezipisidin qaldurulghan kadirlar qanas köli ijtima'iy muqimliqni saqlash qomandanliq merkizidiki xadimlar iken. 

Melum bolushiche, yerlik hökümet da'iriliri 7-öktebir yuqirida tilgha élin'ghan qomandanliq merkizide téléwiziye yighini yoli arqiliq tekshürüsh élip barghan. 

Shu küni qomandanliq merkizide qanas menzire rayoni bashqurush komitétining mu'awin mudiri gaw changjyang, intizam tekshürüsh komitéti sékrétari chi rénpo, siyasiy bölüm mudiri lyuchi, rayon saqchixanisi mu'awin bashliqi wangdé qatarliqlar bar iken. 

Emma ular Uyghur aptonom rayonining partkom sékrétari chén chu'en'goning atalmish “Töt jümle” we “Töt weqe” dep atilidighan üzündilirini yadlap bérelmigen. 

Netije altay wilayetlik waliy mehkimisi mezkur hadisini bir terep qilish üchün mexsus heriketke ötken. Shuning bilen qanas menzire rayonini bashqurush komitétining partkom sékrétari jéng xongchu'en we bashqurush komitéti mudiri xen bawxong wezipisidin toxtitilip tekshürüshke tapshurulghan. 

Uningdin bashqa mu'awin mudir gaw changjyangning derijisi chüshürülgen, wang dégha partiye ichide turghuzup agahlandurush bérilgen. Uningdin bashqa rayon siyasiy qanun komitéti sékrétari we saqchi idarisi bashliqigha chare körülgen. 

Xewerge qarighanda, chén chu'en'goning atalmish “Töt jümle” we “Töt weqe” heqqidiki üzündiliri ötken ayning 29-küni échilghan muqimliq yighinda otturigha qoyulghan we nöwette Uyghur élide hedep teshwiq qilinishqa bashlighan. 

Emma, chén chu'en'goning bu atalmish üzündilirining némilerdin ibaret ikenliki hazirche namelum. 

Qiziq yéri, radiyomizning bu heqtiki ziyaritini qobul qilghan “Shinjang géziti” muherriri bölümidiki xadimlarmu özliri teshwiq qiliwatqan atalmish üzündilerni toluq dep bérelmigen. 

Radiyomizning neqil qilishiche, bu heqte toxtalghan béyjing uniwérsitétining sabiq proféssori chaywmu Uyghur élide nöwette yüz bériwatqan bimeniliklerning medeniyet inqilabi dewridikidin perqsiz ikenlikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.