Чен чүәнго уйғур елидә сиясий бихәтәрлик мәсилисини қаттиқ тәкитлимәктә

Мухбиримиз ирадә
2020-03-26
Share

Уйғур аптоном районлуқ парткомниң секретари чен чүәнго уйғур елидә сиясий бихәтәрликкә капаләтлик қилишни тәләп қилған.

Шинхуа агентлиқиниң бу һәқтики хәвиридин қариғанда, у 25-март күни өткүзүлгән аптоном районлуқ партийә комитетиниң сиясий қанун хизмәт йиғинида сөз қилип, хитай дөләт рәиси ши җинпиңниң көрсәтмисидин қәтий тәврәнмәсликни әскәрткән.

У йиғинда қилған сөзидә, сиясий бихәтәрликни қоғдаш мәсилисини биринчи орунға қойған вә “биз қәтий тәврәнмәй сиясий бихәтәрликни қоғдишимиз керәк. Омумий дөләт бихәтәрлик уқумида чиң туруп, сиясий бихәтәрликни қоғдашни әң муһим сиясий вәзипә қилип, һәр хил сиясий бихәтәрлик хәвпини қәтий түгитишимиз керәк” дегән.

Хитайниң вухән шәһиридин ямриған таҗсиман вирусниң дуняви зор балайиапәткә айлинишиға хитай һөкүмитиниң учурни қамал қилип, әмәлийәтни йошуруши сәвәб болғанлиқи күчлүк әйибләшкә учриған. Буниң хитай һакимийәт қатлими ичидиму ши җинпиңгә болған наразилиқни күчәйткәнлики һәққидә бир қисим учурлар ашкариланған. Шуңа чен чүәнгониң сиясий бихәтәрликни тәкитлиши диққәт қозғайдикән.

Чен чүәнго шу күндики сөзидә йәнә, районда иҗтимаий муқимлиқни сақлашни, милләтләр иттипақлиқини илгири сүрүп, милләтләрниң арилишиши вә бирлишишини илгири сүрүп, җуңхуа миллити бәрпа қилиш, динни башқурушни күчәйтип, динни сотсиялистик җәмийәткә маслаштуруш дегәнләрни тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт