Uyghur élining partkom sékrétari chén chüen'go yuqum mezgilide muqimliqqa kapaletlik qilishni tekitligen

Muxbirimiz irade
2020-08-27
Élxet
Pikir
Share
Print

Uyghur aptonom rayonluq partkomning sékrétari chén chüen'go yuqum mezgilidiki muqimliqqa kapaletlik qilishni telep qilghan. Chén chüen'go 25-awghust küni, partiye komitéti da'imiy komitét (kéngeytilgen) yighini chaqirip, yuqumning aldini élish we kontrol qilish we bu mezgildiki muqimliqqa kapaletlik qilishni tekitligen. U yighinda qilghan sözide "Yuqumning qayta örlesh xewpi yenila mewjut, yilliq iqtisadiy we ijtima'iy tereqqiyat nishanini orundash wezipisi müshkül. Küz we qish pesillik yuqumni kontrol qilish xizmetlirini ching tutup ishlep, jiddiy taqabil turush sewiyisini üzlüksiz östürüshimiz kérek" dep tekitligen.

Biraq u bu jeryanda ijtima'iy muqimliqni qet'iy saqlash kéreklikinimu eskertip "Bash nishan'gha ehmiyet bérip, birikme mushni yaxshi étip, barliq muqimliqni qoghdash xizmetlirini dawamlashturushimiz kérek we bu arqiliq yuqumning aldini élish we kontrol qilish, iqtisadiy we ijtima'iy tereqqiyatni omumyüzlük ilgiri sürüsh üchün yaxshi muhit yaritishimiz kérek" dégen.

Xitay hökümiti Uyghur élide 10 kündin buyan yéngi yuqumlan'ghuchi körülmeywatqanliqini ilgiri sürgen bolsimu, ahalilerge qaratqan qamalni bikar qilmighan. Uning üstige qamal mezgilidiki bir qisim insaniy bolmighan mu'amililermu ahalilerning küchlük naraziliqini qozghighan. Netijide bolupmu xitaylar türlük munazire tor betliride öz naraziliqlirini ashkara halda ipadileshke bashlighan idi.

Awstraliyening "ABC" qanili bu heqtiki xewiride özliri ziyaret qilghan ismini ashkarilimighan melum bir xitayning sözini neqil qilip turup "Uyghurlarning keng kölemde tutqun qilinip erkinlikidin mehrum qilinishigha süküt qilghan xitay ahalisi oxshash künning öz béshigha kelgenlikini kördi" dep yazghan.

Chén chüen'goning yuqum mezgilidiki muqimliqni tekitlishi yuqiridiki bu naraziliq bilen munasiwetlik bolushi mumkin dep perez qilinmaqta.

Toluq bet