Xitayning kanadada turushluq elchixana binasigha “Chéqilidu” dégen xet yézip qoyuldi

Aldinqi charshenbe küni etigen xitayning amérika paytexti washin'gtondiki elchixanisining derwazisigha namelum kishiler teripidin yoghan qara xet bilen “Chéqilidu” dégen xetni yézip qoyulghandin kéyin bir hepte ötmeyla oxshash weqe yene xitayning kanadada turushluq elchixanisdimu yüz berdi.

Firansiye agéntliqining xewer qilishiche, bu heriketlerni “Qush herikiti” deydighan démokrat xitay teshkilati pilanlighan bolup, ular bundaq qilish arqiliq xelq'ara jama'etning diqqitini xitaydiki kishilik hoquq depsendichilik qilmishlirigha, erzdarlarning mesilisige tartishni meqset qilghanliqini bildürgen.

Mezkur xewer xitay ichidiki xewer torliridimu tarqilip keng inkas qozghighan. Xitayning hökümet awazi bolghan yershari waqti géziti bolsa chet'ellerdiki xitay elchixanilirining bixeterlikini ashurush kéreklikini teshebbus qilghan.

Xongkongdiki axbarat wasitiliri bolsa, bu heqtiki xewerlerde xelqning hökümetke naraziliqining küchiyiwatqanliqini tilgha alghan we “Hökümetning yerlerni mejburiy tartiwélish siyasiti xelqni narazi qiliwatqan eng chong mesile ”dep körsetken. Statistikilardin qarighanda xitaydiki 43 pirsent déhqanning yéri dölet teripidin mejburiy tartiwélin'ghan. Her yili xitayda yüz bériwatqan naraziliq heriketlirining 65 pirsenti del mushundaq yer tartiwélish herikiti sewebidin kélip chiqidiken.