Хитайниң чәтәлләрдики уйғур оқуғучиларни “ов нишани” қилиши хәлқарада ғулғула қозғиди

Мухбиримиз әзиз
2017.08.01

Мисирдики уйғур оқуғучиларниң қолға елинишидин башланған ғулғула һазир бу ишларниң бир қетимлиқ уштумтут һадисә әмәс, бәлки хитайниң пиланлиқ вә қәдәм-басқучлуқ тәдбири икәнликидин бешарәт беришкә башлимақта.

Әнглийәдә чиқидиған “пул-муамилә вақти” гезитидә бүгүн елан қилинған мәхсус темидики мақалидә хитай һөкүмитиниң “чәтәлләрдики уйғур оқуғучилар сиртта узун туруп қалса әсәбийликни юқтурувалиду” дәп қарайдиғанлиқи мисал елинған һәмдә хитай һөкүмитиниң мисирдики оқуғучиларни қайтуруп келиш ишлирини бу ишларни нәччә айлар илгирила башлап болғанлиқи баян қилинған. Шуниңдәк бир қисим чәт дөләтләрниң хәлқара қанунларға хилап һалда уйғурларни хитайға қайтуруп бериш вәқәлириниң илгириму көп қетим болғанлиқи, бу уйғурларниң тәқдири һәрқачан намәлум болуп кәлгәнлики әсләп өтүлгән.

“хәлқара кәчүрүм тәшкилати” ниң хоңкоңдики хадими виллям не бу һәқтә пикир қилип, “хитай өзлириниң контроллуқида болмиған һәрқандақ шәкилдики ислам әқидисини бастурушни ойлайду. Шуниң билән биргә чәтәлдин келидиған идийәләрниң ислам дини, христианлиқ яки демократийәгә мәнсуп болушидин қәтийнәзәр уларниң һәммисини өзлири үчүн тәһдит, дәп қарайду” дегән.

Мәлум болушичә “хәлқара кәчүрүм тәшкилати” бүгүн җиддий мураҗиәтнамә елан қилип, һазирға қәдәр мисирдин 22 уйғур оқуғучиниң хитайға қайтурулғанлиқини, техиму көп уйғур оқуғучиларниң мушундақ тәқдиргә дуч келиш алдида туруватқанлиқини әскәртти. Шуниң билән биргә хәлқара җәмийәттин тездин мисир һөкүмитигә бесим ишлитишини тәләп қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.