Chasa amanliq mudiri: "Terbiyeliniwatqanlar arisida chet'eldin qaytip kelmigenlerning a'ile-tawabatlirimu xéli bar"

Muxbirimiz shöhret hoshur
2018-01-10
Élxet
Pikir
Share
Print

Muxbirimizgha nöwette qeshqerdiki "Yépiq terbiyilesh merkezliri" de terbiyeliniwatqanlarning terkibi heqqide melumat bergen qeshqer sheherlik chasa kocha bashqarmisining amanliq mudiri "Terbiye" ge tutulghanlar arisida chet'elni sayahet qilip kelgen we tarqaq hej qilip kelgenlerdin bashqa yene chet'elge chiqip kétip qaytip kelmigenlerning a'ile-tawabatliriningmu belgilik sanda barliqini tilgha aldi.

Bu heqte éniq sandin xewersizlikini bayan qilghan bu amanliq mudiri, misal süpitide türkiyede yashawatqan Uyghur muhajirlardin abduraxman haji bilen nurdun qarihajining birdin qérindishining qamaqta ikenlikini ashkarilidi.

Uyghur pa'aliyetchiliri, nöwette muhajirettiki Uyghurlarning köpinchisining a'ile-tawabatliridin birdin birnechchige qeder kishining qamaqta ikenlikini ilgiri sürmekte. Yene ularning bayan qilishiche, chet'eldiki bezi pa'aliyetchilerning biwasite a'ile-ezaliridin bashqa yiraq-yéqin uruq-tughqanliridin bolup 20-30 che kishi türme yaki "Terbiyilesh merkezliri" de jazalanmaqtiken. 

Muxbirimizning ötken yili ramzan mezgilide qeshqer yapchan'gha qarita élip barghan téléfon ziyariti dawamida türmidiki meshhur jama'et erbabi abduqadir yapchanning uruq-tughqan we dost-buraderliridin bolup 30 che kishining nöwette türme we qamaqta ikenlikini yerlik da'iriler delilligen idi.

Toluq bet