Béyjing saqchilirining "Chiray tonush" közeyniki pat arida Uyghurlargha toghrilanmaqchi

Muxbirimiz eziz
2018-03-12
Share

Ötken heptidin bashlap béyjingdiki saqchilarning eng yéngi pen-téxnika wasitiliridin bolghan "Chiray tonush" iqtidari seplen'gen közeynek ishlitishni bashlighanliqi melum.

Xewerlerde éytilishiche, bu xil közeynekler aldinqi ayda xénendiki saqchilar ishletken mushu xildiki közeyneklerge oxshap kétidighan bolup, asasliqi kétiwatqan mashinilarning nomur taxtisini we mashina ichidiki yoluchilarni perqlendürüsh, shu arqiliq bu kishilerning "Xeterlik" yaki emeslikini belgilesh iqtidarigha ige iken.

"Téxnika xewerliri" torida éytilishiche, bu xildiki közeyneklerge "Teqlidiy eqil" qollinilghan bolup, adette uni taqiwalghan saqchilar herqandaq mashinigha yüzlen'gende shu mashina yaki mashina ichidiki ademler heqqide bir milliy sékunt ichide höküm chiqiralaydiken. Bu xildiki közeyneklerni sinap ishlitip baqqan saqchilar bu heqte toxtilip, "Sür'et we ünüm jehette kishini heqiqeten heyran qalduridu" dégen. Shundaqla mushu közeynekning yardimide qéchip yürgen birnechche jinayetchini tutuwalghanliqini éytqan.

Xewerde körsitilishiche, Uyghurlar diyarida "Bixeterlik" namida keng miqyasta qolliniliwatqan téxnika wasitilirining biri del mushu xil "Chiray tonush" téxnikisi iken. Ahalisining yérimidin köpreki Uyghurlar bolghan mezkur rayonda kishilerning chirayi we mashinilarning nomur taxtisi herqachan tekshürülidighan nishanlardin hésablinidiken. Shuning üchün bu xil yéngi közeynekning Uyghurlar diyarigha yétip kélishi pat yéqindiki ishlardin iken.

Melum bolushiche, yuqiri pen-téxnika arqiliq nazaret qilish méxanizmi xitayda téz sür'ette ashmaqta iken. Nöwette xitay teweside 170 milyon közitish kamérasi ornitip bolun'ghan bolup, 2020-yiligha barghanda bu sanning üch qatlinidighanliqi mölcherlenmekte iken. Shu chaghda xitaydiki her ikki puqragha birdin kaméra toghra kélidighan weziyet shekillinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.