Уйғур аптоном районидин йәнә 7 нәпәр әмәлдар чириклик билән тутуп турулуп тәкшүрүлмәктикән

Мухбиримиз қутлан
2017-01-01
Елхәт
Пикир
Share
Принт

Игилинишичә, уйғур аптоном районлуқ интизам тәкшүрүш комитети йеқинда омумий уқтуруш чиқирип, 7 нәпәр әмәлдарниң «интизамға еғир дәриҗидә хилаплиқ қилғанлиқи» сәвәбидин тәкшүрүливатқанлиқини билдүргән.

Хәлқ ториниң бу һәқтики хәвиригә қариғанда, омумий уқтуруш чиқирилип тәкшүрүливатқан 5 нәпәр әмәлдар хотән вилайәтлик хәлқ қурултийи хизмәт комитети партийә гурупписиниң сабиқ муавин секритари өткүр алим, алтай шәһәрлик парткомниң секритари ваң шибин, үрүмчи наһийәлик маарип идариси парткоминиң сабиқ секритари гав йоңчиң вә үрүмчи наһийәлик маарип идарисиниң сабиқ башлиқи җаң йүхоң, қумул шәһәрлик деһқанчилиқ идариси уруқчилиқ мәйдани партийә ячейкисиниң сабиқ секритари фаң юңчаң вә мәзкур уруқчилиқ мәйданиниң сабиқ башлиқи җаң вейшиң қатарлиқлар икән.

Тутуп туруп тәкшүрүливатқан йоқириқи 7 нәпәр әмәлдарниң 5 нәпири хитай, икки нәпири уйғур болуп, көзәткүчиләр йәнә бир қетим районда җазаланған яки делоси тәкшүрүливатқан хитай әмәлдарлариниң мутләқ көп қисминиң «парихорлуқ» вә «чириклик» кә четиливатқанлиқини тәкитлимәктә.

Техи алдинқи һәптә уйғур аптоном районлуқ интизам тәкшүрүш комитети уқтуруш чиқирип, хотән вилайәтлик мәмурий мәһкиминиң муавин валийси, қошумчә гума наһийәлик парткомниң секритари шен йиниң «интизамға еғир дәриҗидә хилаплиқ қилиш» җинайити билән тутуп туруп тәкшүрүливатқанлиқини билдүргән иди. Ундин башқа, хитай таратқулири йәнә бу йил 4-айда хотән шәһәрлик парткомниң секритари чен йвәнхваниң «интизамға еғир дәриҗидә хилаплиқ қилиш» җинайити билән җазаланғанлиқини хәвәр қилған иди.

Муһаҗирәттики сиясий анализчилар, уйғур диярида дело турғузулуп тәкшүрүливатқан хитай әмәлдарлириниң «парихорлуқ» вә «чириклик» кә, әмма йәрлик уйғур әмәлдарларниң болса «сиясий мәйдан» мәсилисигә четиливатқанлиқини илгири сүрмәктә.

Пикирләр (0)
Share
Толуқ бәт