Uyghur kadirlarning choshqa göshi yéyishi daghdugha bilen omumlashturulmaqta

Muxbirimiz eziz
2018.10.09

Yéqindin buyan ichkiri xitayda ali mektep püttürgen yüsüp réshit isimlik bir Uyghur yash bashlap bergen “Dostum, men üchün halal réstoran izdep aware bolmang!” témisidiki chaqiriqning omumlishishi netijiside yerlik Uyghur kadirlarning kolléktip ziyapet sorunida mexsus choshqa göshidin teyyarlan'ghan xas qorumilarni xitaylar bilen birlikte yégenliki xitay metbu'atlirida alahide xewer qilinishqa bashlidi.

9-Öktebir küni ündidarda hembehirlen'gen bey xu'alin imzasidiki “Yémek-ichmek perhizlirini buzup tashlap, zaman'gha layiq turmushqa intileyli!” serlewhilik maqalida bayan qilinishiche, ikki kün ilgiri maralbéshi nahiyesi alaghir yézisining bashliqi ablikim mömin yézidiki Uyghur kadirlarni islam dinining yémek-ichmek heqqidiki perhizlirini buzup tashlashqa chaqiriq qilghan.

Shu küni ablikimning bashchiliqidiki barliq Uyghur kadirlar sériqbuya baziridiki xitay réstoranida mexsus teyyarlan'ghan ziyapetke qatniship qizartip pishurulghan choshqa kallisi, qizghuch renglik choshqa qorumisi qatarliqlarni yégen. Ablikim bu heqte söz qilip: “Jungxu'a yémeklikliri dunyada shunche shöhretlik bolsimu bizdiki diniy cheklimiler tüpeylidin biz yillardin béri buninggha éghiz tégelmey kelduq. Bügündin bashlap bir meydan ‛til inqilabi‚ ni bashlap, diniy cheklimilerni üzül-késil buzup tashlayli!” dégen hemde köpchilikke ülge bolup texsidiki choshqa qorumisidin bir parchini éghzigha sélip mezze qilip chaynighan. Aptor bu heqte toxtilip “Uyghur kadirlar ablikimge egiship jungxu'a millitining ésil nazunémetlirini tétighandin kéyin birdek bashmaltaqlirini chiqirip maxtashti” dégen.

Melum bolushiche, maralbéshi nahiyesining hakimi yéqinda téléwiziyede mexsus nutuq sözlep halal-haram heqqidiki diniy chüshenchilerdin uzaq turushqa chaqiriq qilghan. Shuningdek puqralarning din'gha étiqad qilish yaki qilmasliq erkinliki bolghinidek, ularning qandaq yémeklik yéyish erkinlikiningmu barliqini tekitligen.

Maralbéshi nahiyeside ötken mezgillerde éghir qarshiliq heriketliri köp qétim körülgen bolup, 2013-yilidiki “23-Aprél sériqbuya weqesi” birqeder zor ghulghula qozghighan weqelerdin hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.