Tumshuq shehiride öy chéqishqa qarshiliq qilghanlar tutqun qilindi

Ötken hepte Uyghur élining ishlepchiqirish - qurulush armiyisi 3 - diwiziyisige qarashliq tumshuq sheherlik hökümet sheherni kéngeytish qurulushi namida etraptiki déhqanlarni öyliridin mejburi köchüshke zorlighan. Öy chéqishqa naraziliq bildürgüchilerni tutqun qilghan.

“Uyghurbiz” torining bu heqte bergen xewiride déyilishiche, 20 - aprél küni tumshuq shehiridiki 44 - polkning saqchixanidiki saqchilar, sheherlik pilan idarisining kadirliridin 50 tek kishi,4 - etretke qarashliq déhqanlarning öylirini mejburi chéqish üchün kelgende déhqanlarning qarshiliqigha uchrighan. Saqchilar bilen déhqanlar arisida deslep aghzaki tillishish, kéyin toqunush yüz bérip déhqanlardin 18 kishi tutqun qilin'ghan. Melum bolushiche tutqun qilin'ghanlar ichidiki 4 neper qoramigha yetmigen bala qoyup bérilgen bolsimu emma quramigha yetken 14 kishi qoyup bérilmigen.

Tumshuq shehirige qarashliq 4 - etret asasen Uyghurlardin terkip tapqan bolup, xewerde tutqun qilin'ghanlarning millet terkibi éniq déyilmigen. Emma xewerde tutqun qilin'ghanlardin tursun memet isimlik déhqandin bashqa,44 - polkqa qarashliq milli ottura mektepning tursun hesen, qadir dawut, qadir yüsüp qatarliq 8 neper oqutquchisimu öy chéqishta “Maslashmighan” dégen bahanida xizmitidin toxtitip qoyulghanliqi tilgha élin'ghan.