Америка мәркизи истихбарат идариси (CIA) мәхсус хитайға қарши туруш мәркизи қурған

Мухбиримиз әркин
2021-10-08
Share

Америка мәркизи истихбарат идариси (CIA) мәхсус хитайға аит истихбарат топлайдиған вә хитайниң америкадики җасуслуқ һәрикәтлиригә тақабил туридиған йеңи мәркәз қурған. "вашингтон почтиси гезити" ниң хәвиридә ейтилишичә, бу юқири дәриҗилик америка әмәлдарлириниң хитай билән һәммини өз ичигә алған узун йиллиқ бир күрәшкә тәйярлиқ қиливатқанлиқиниң йәнә бир ипадиси икән.

Мәркизи истихбарат идарисиниң башлиқи вилям бурнис 6-өктәбир күни мәркизи истихбарат идариси хадимлириға қилған сөзидә, бу мәркәз: "бизниң 21-әсирдә дуч кәлгән хитай һөкүмитидәк дүшмәнлики күнсери ешиватқан әң муһим гео-сияси тәһдиткә қарита коллектип хизмитимизни техиму күчәйтиш тиришчанлиқидур" дәп көрсәткән.

"вашингтон почтиси" ниң қәйт қилишичә, юқири дәриҗилик бир мәркизи истихбарат идариси әмәлдари, хитайға қарши туруш һәрикитиниң көлимини совет иттипақиға қарши соғуқ мунасивәтләр урушиға селиштуруп, бирақ "хитайниң америка вә дуня билән зич бағлинишлиқ ‍иқтисадий көлими түпәйли техиму қорқунчлуқ вә мурәккәп рәқиб икәнлики" ни ейтқан.

Юқириқи әмәлдар йәнә мәркизи ‍истихбарат идарисиниң советқа қарши турғанда қилғинидәк дунядики һәр қайси дөләтләргә техиму көп хадим, тилшунас, техник вә мутәхәссис орунлаштуруп, хитайға қарши ‍истихбарат топлайдиғанлиқини билдүргән. "вашингтон почтиси" ниң ейтишичә, "хитай мәркизи" ниң қурулуши хитайниң мәркизи ‍истихбарат идарисиниң 1-номурлуқ нишаниға айланғанлиқиниң ипадиси икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт