CIA Дики хитай җасуси өз җинайитини етирап қилди

Вашингтондин мухбиримиз ирадә тәйярлиди
2024.05.30

Америка әдлийә министирлиқиниң җакарлишичә, ма йүчиң вә униң исми ашкариланмиған бир туғқини бирдәк америка мәркизий истихбарат идариси (CIA) ниң сабиқ хизмәтчилири болуп, улар айрим-айрим һалда хоңкоң вә шаңхәйдә туғулған һәмдә кейинчә америка пуқралиқиға өткән икән. Ма йүчиң 1982-йилдин 1989-йилғичә, униң туғқини 1969-йилдин 1983-йилғичә CIA да хизмәт қилған.

CIA Ниң хизмәтчиси болуш сүпити билән һәр иккисиниң CIA ниң сәзгүр вә мәхпий учурлирини көрүш салаһийити бар болуп, улар йәнә бу учурларниң мутләқ мәхпийәтликини қоғдаш һәққидики мәсулийәт һөҗҗитигиму имза қойған. Әмма ма йүчиң 2001-йили 3-айда, йәни CIA да ишлимигән мәзгилидә шаңхәй дөләт бихәтәрлик идариси (SSSB) истихбарат хадимлириниң тәклипи билән өзиниң туғқинини бу идариниң хадими билән көрүшүшкә мақул кәлтүргән. Нәтиҗидә униң туғқини хитай истихбарат хадими билән хоңкоңдики бир меһманханида учришип уни американиң зор миқдардики дөләт мудапиә учурлири билән тәминлигән. Буниң бәдилигә у 50 миң доллар пул алған. Улар йәнә бу хадим билән давамлиқ һәмкарлишишқа қошулған.

2003-Йили 3-айда ма йүчиң һавайда турған мәзгилдә америка федератсийә тәкшүрүш идариси (FBI) ниң һонолулу база ишханисида тохтамлиқ тәрҗиман болушқа илтимас қилған. Әйни чағда америка федератсийә тәкшүрүш идариси ма йүчиңниң хитай истихбарат органлири билән болған алақисини билгән болсиму уни из қоғлап тәкшүрүш пиланиниң бир қисми сүпитидә ишқа қобул қилған вә бу арқилиқ униң паалийитини вә хитай билән болған алақисини тәкшүргән. Нәтиҗидә ма йүчиң 2004-йили 8-айдин 2012-йили 10-айғичә FBI да ишлигән.

Майүчиң бу җәрянда йәни, 2006-йили 2-айда, өзиниң туғқинини шаңхәй истихбарат хадимлири тәләп қилған америкалиқ икки шәхсниң кимлик мәлуматлирини тәминләп беришкә қайил қилған. Бу шәхсләрниң салаһийити американиң дөләт мудапиә учури болуп һесаблинидикән. У өзиниң юқиридики учурни йәткүзүшниң американиң хәвпсизлики үчүн зиянлиқлиқини билип туруп қилғанлиқини иқрар қилған. У 2020-йили қолға елинған икән. Униң сот һөкми 2024-йили 9-айда елан қилинидикән.

Бундин сирт, бүгүн америка даирилири йәнә 35 яшлиқ ваң йүнхе исимлик хитайни сингапорда қолға чүшүргән болуп, у тор җинайити билән шуғуллиниш арқилиқ америка һөкүмитигә аит нәччә милярд доллар пулни алдап еливалған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.