CNN Телевизийәсидә уйғур елидики«йепиқ тәрбийә лагерлири» мулаһизә қилинди

Мухбиримиз ирадә
2018-09-11
Елхәт
Пикир
Share
Принт

Америкидики даңлиқ телевизийә қаналлиридин CNN телевизийәсидә уйғур елидики «йепиқ тәрбийә лагерлири »мәсилиси мәхсус хәвәр қилинди.

Дүшәнбә күни, америкидики кишилик һоқуқни көзитиш тәшкилати уйғур елидики йепиқ тәрбийә лагерлири һәққидә интайин тәпсилий мәлуматлар берилгән чоң көләмлик доклатини елан қилғандин кейин күчлүк инкас пәйда қилған иди. CNN Телевизийәсиму бу доклатни мәхсус хәвәр қилип, уйғур елидә йолға қоюлуватқан лагерлар мәсилисигә диққәт тартти.

CNN Қанилида бу һәқтә елан қилинған хәвәрдә америкидики уйғур кишилик һоқуқ қурулуши башлиқи өмәр қанат, кишилик һоқуқни көзитиш тәшкилати хитай ишлири директори софей речардсон вә америкилиқ журналист мега раҗагопалан қатарлиқлар зиярәт қилиниш арқилиқ уйғур елиниң вәзийити, уйғурлар учраватқан еғир зулум сиясәтлириниң арқа көрүнүши мулаһизә қилинди.

Өмәр қанат әпәнди сөзидә, хитай һөкүмитиниң милйонлиған уйғурни лагерға солаш, сиртта қалғанларни болса өйлиригичә кирип назарәт қилиш арқилиқ нәтиҗидә уйғур миллий кимликини йоқитишни мәқсәт қиливатқанлиқини ейтти.
Софей речардсон ханим болса CNN телевизийәсидә қилған сөзидә хитай һөкүмити уйғур елидә йүргүзүватқан инсан һоқуқи дәпсәндичиликиниң дуняда нәччә он йиллардин буян көрүлүп бақмиған дәриҗидә еғирлиқини әскәртип: «һазирқи мәсилә буниңға дуняниң қандақ инкас қайтуридиғанлиқидур» деди.

Кишилик һоқуқни көзитиш тәшкилати «идийәви кесәлликни йоқитиш» дәп мавзу қоюлған доклатини тәйярлаш үчүн нәччә онлиған шаһитларни зиярәт қилған. Улар тәмин әткән әһвалларға қариғанда, лагерларға қамалған кишиләр сақчиларниң қолиға чүшкән вақиттин тартипла мәҗбурий сорақ қилиниш, җисманий қийнаққа тартилиш, кесәл болуп қалғанда давалиналмаслиқ, инсанлиқ иззити болмаслиқ дегәндәкләрниң һәммисини баштин кәчүргән. Гуваһчиларниң баянлири лагердики әһвалларниң кишиләр тәсәввур қилғандин нәччә он һәссә ешип кәткәнликини көрсәткән иди.

Пикирләр (0)
Share
Толуқ бәт