CNN Téléwiziyeside Uyghur élidiki"Yépiq terbiye lagérliri" mulahize qilindi

Muxbirimiz irade
2018-09-11
Élxet
Pikir
Share
Print

Amérikidiki dangliq téléwiziye qanalliridin CNN téléwiziyeside Uyghur élidiki "Yépiq terbiye lagérliri "mesilisi mexsus xewer qilindi.

Düshenbe küni, amérikidiki kishilik hoquqni közitish teshkilati Uyghur élidiki yépiq terbiye lagérliri heqqide intayin tepsiliy melumatlar bérilgen chong kölemlik doklatini élan qilghandin kéyin küchlük inkas peyda qilghan idi. CNN Téléwiziyesimu bu doklatni mexsus xewer qilip, Uyghur élide yolgha qoyuluwatqan lagérlar mesilisige diqqet tartti.

CNN Qanilida bu heqte élan qilin'ghan xewerde amérikidiki Uyghur kishilik hoquq qurulushi bashliqi ömer qanat, kishilik hoquqni közitish teshkilati xitay ishliri diréktori soféy réchardson we amérikiliq zhurnalist méga rajagopalan qatarliqlar ziyaret qilinish arqiliq Uyghur élining weziyiti, Uyghurlar uchrawatqan éghir zulum siyasetlirining arqa körünüshi mulahize qilindi.

Ömer qanat ependi sözide, xitay hökümitining milyonlighan Uyghurni lagérgha solash, sirtta qalghanlarni bolsa öylirigiche kirip nazaret qilish arqiliq netijide Uyghur milliy kimlikini yoqitishni meqset qiliwatqanliqini éytti.
Soféy réchardson xanim bolsa CNN téléwiziyeside qilghan sözide xitay hökümiti Uyghur élide yürgüzüwatqan insan hoquqi depsendichilikining dunyada nechche on yillardin buyan körülüp baqmighan derijide éghirliqini eskertip: "Hazirqi mesile buninggha dunyaning qandaq inkas qayturidighanliqidur" dédi.

Kishilik hoquqni közitish teshkilati "Idiyewi késellikni yoqitish" dep mawzu qoyulghan doklatini teyyarlash üchün nechche onlighan shahitlarni ziyaret qilghan. Ular temin etken ehwallargha qarighanda, lagérlargha qamalghan kishiler saqchilarning qoligha chüshken waqittin tartipla mejburiy soraq qilinish, jismaniy qiynaqqa tartilish, késel bolup qalghanda dawalinalmasliq, insanliq izziti bolmasliq dégendeklerning hemmisini bashtin kechürgen. Guwahchilarning bayanliri lagérdiki ehwallarning kishiler tesewwur qilghandin nechche on hesse éship ketkenlikini körsetken idi.

Toluq bet