Daghistanliq bokschi artur bétérbayéf Uyghurlar seweblik xitayda musabiqighe chüshüshni ret qilghan

Muxbirimiz erkin
2019.12.30

Rusiyening daghistan jumhuriyitilik musulman bokschi artur bétérbayéf, xitayning Uyghur musulmanlirini lagérlargha qamishi we kishilik hoquqini depsende qilishi seweblik xitayda musabiqighe chüshüshni ret qilghan.

“Bedléft xuk” namliq tenterbiye torining xewer qilishiche, mezkur éghir derijilikler boks chimpiyoni esli kéler yili 1‏-féwral küni xitay bokschisi méng fenlong bilen musabiqighe chüshüshi oylashqan idi. Lékin, aqiwette artur bétérbayéf xitayda musabiqighe chüshüshni xalimighan. Xewerde amérikaliq boks mulahizichisi gebi opénhéyimning sözi neqil keltürülishiche, artur bétérbayéf özining “Xitayning Uyghur dindashlirigha tutqan mu'amilisini bir musulman bolush süpitide éghir jinayet” dep hésablighan. 

Xewerde, bétérbyéfning pikirini özgertishige “Xitayning yéqinda ashkarilan'ghan Uyghurlargha qarita ménge yuyush élip bériliwatqanliqigha da'ir höjjetlerni saxta, dep élan qilishining héchqandaq yardimi bolmighanliqi” bildürülgen. “Nyu-york waqti” géziti bilen washin'gtondiki “Xelq'ara tekshürüsh axbaratchiliqi inistituti” xitayning Uyghur rayonidiki lagérlargha da'ir nechche yüz betlik mexpiy höjjitini ashkarilap, dunyada qattiq ghulghula qozghighan. Bu höjjetler “Xitayning Uyghurlarni basturuwatqanliqining éniq delili” dep qaralghan idi.

Artur bétérbayéf gérmaniyelik putbol cholpini mes'ut özil, yéngi zéllandiyelik zeytun top cholpini soniy bil willi'amisdin kéyin xitayning Uyghurlarni basturushini eyibligen yene bir ataghliq tenterbiye cholpinidur. Xitay hökümiti ilgiri mes'ut özil bilen soniy willi'amisning Uyghurlar heqqidiki sözlirige qattiq inkas qayturup, ularning “Saxta xewerler” ning azdurushigha uchrap ketkenlikini ilgiri sürgen. 

Xitay hökümiti özlirining 3 milyondek Uyghur, qazaq we bashqa musulmanlarni lagérlargha qamap, ularni xorlawatqanliqi, ularning medeniyiti, tili, diniy étiqadini cheklewatqanliqigha da'ir höjjjet we doklatlarni “Saxta‏ xewer” dep ret qilip kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.