Xitay, déplomatlar we b d t emeldarlirigha mektup yollap ularni dalay lama qatnishidighan yighin'gha qatnashmasliqqa chaqirghan


2016-03-10
Share

Jenwede bu jüme küni ötküzülidighan nobél mukapati sahiblirining söhbet yighinigha dalay lamaning qatniship söz qilidighanliqi xitay hökümitining qarshiliq qilishigha uchridi.

Roytérs agéntliqining xewer qilishiche, xitay da'iriliri mezkur yighin'gha ishtirak qilidighan déplomatlar we b d t emeldarlirigha mektup yollap ularni bu pa'aliyetke qatnashmasliqqa chaqirghan.

Ular xétide, dalay lamaning bu yighin'gha chaqirilishini xitayning igilik hoquqigha qilin'ghan depsendichilik dep qaraydighanliqini, dalay lamaning herqandaq bir dölette, herqandaq uslub we namdiki bölgünchilik heriketlirige qet'iy qarshi turidighanliqini tekitligen.

Melum bolushiche, bu mektup 8-mart küni yézilghan bolup, u del amérika we kanadaning bu yighinni qollighuchi dölet ikenliki élan qilin'ghan kün iken. Yighinni uyushturghuchi orun bolghan "Jenwe graduéyt instituti" bashliqi filip burrin roytérs muxbirigha qilghan sözide, bu heqte nurghun bésim kelgenlikini, biraq bu yighinning bikar qilinmaydighanliqini tekitligen.

Dunya Uyghur qurultiyining bildurishiche, xitay hökümiti bundin ilgirimu dunya Uyghur qurultiyining re'isi rabiye qadir xanim we bashqa duq wekilliriningmu mushu xildiki yighinlargha qatnishishini cheklesh üchün heriket qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet