Ammiwi teshkilatlar déngiz mehsulatliri teminlesh zenjirini dawamliq tekshürüshni telep qilghan

Bir qisim ammiwi teshkilatlar yéqinda herqaysi déngiz mehsulatliri shirketliri we parche satquchilirigha xet ewetip, ulardin özlirining teminlesh zenjiride Uyghurlar yaki shimaliy koréyeliklerning mejburiy emgiki bar-yoqluqini dawamliq tekshürüp turuwatqan yaki turmaywatqanliqini sorighan.

“Déngiz mehsulatliri menbesi” (SeafoodSource) namliq tor bette bérilgen xewerge qarighanda, bu ammiwi teshkilatlar xétide, yuqiridiki shirketlerdin teminlesh zenjiri heqqidiki yéngi melumatlarni telep qilghan.

Ötken yili 10-ayda “Qanunsiz déngiz herikiti” (The Outlaw Ocean Project) namliq bir musteqil tetqiqat orgini 4 yilliq tekshürüsh netijisige asasen doklat élan qilip, shimaliy amérika bazirigha kiriwatqan déngiz mehsulatlirining köp qismini teminlep kéliwatqan xitayning kem dégende 10 déngiz mehsulati shirkitining Uyghur mejburiy emgikige chétilidighanliqini ashkarilighanidi. Bu doklat netijiside, déngiz mehsulatliri oqetchiliki ezaliri, yémeklik mulazimiti kespidikiler, jümlidin xaylaynir yémeklikliri (High Liner Foods), albértson (Albertsons) we sisko (Sysco) markiliq parche satquchilar xitay déngiz mehsulatliri shirketliri bilen alaqisini üzgen hemde teminlesh zenjirining Uyghurlar we bashqilarning mejburiy emgikidin xaliy bolushigha kapaletlik qilidighanliqi heqqide wede bergenidi.

15-Iyul küni, ammiwi teshkilatlar yuqirida ismi atalghan déngiz mehsulatliri shirketliri we parche satquchilargha ewetken xetliride, bu shirketlerning teminlesh zenjirige qaratqan tekshürüshlirining qandaq kétiwatqanliqini sorighan we uning netijisini bilmekchi boluwatqanliqini bildürgen. Ular déngiz mehsulatliri sahesining mejburiy emgektin xaliy bolushigha her waqit kapaletlik qilish üchün bu sahediki barliq tereplerning bu mesilige dawamliq köngül bölüshini telep qilghan.

 “Déngiz mehsulati menbesi” tori élan qilghan xewerde déyilishiche, yuqiridiki xetke Uyghur amérika birleshmisi, Uyghur kishilik hoquq qurulushi, Uyghur herikiti teshkilati, xelq'ara qulluqqa qarshi turush birliki, yer shari emgek edliyesi we ishchilar hoquqi birleshmisi qatarliq 18 ammiwi teshkilat imza qoyghan.