Dilber yunusning béyjingda oyun qoyushi Uyghur közetküchilerning tenqidige uchridi

2018-03-07
Élxet
Pikir
Share
Print

"Xitay kündilik géziti" ning xewer qilishiche naxshichi dilber yunus ete 8-mart ayallar bayrimi munasiwiti bilen béyjingda oyun qoymaqchi.

Bu yil 60 yashqa kirgen, finlandiye wetendishi dilber yunusning, Uyghur rayonida weziyet eng éghirlashqan künlerde béyjingda oyun qoyushqa hazirlinishi muhajirettiki Uyghur közetküchilerning tenqidige uchridi.

Washin'gtonda yashawatqan siyasiy közetküchi uchqunjan ependi, bir naxshichi sen'etkar bolush üchün aldi bilen insaniy peziletke ige bolushi kéreklikini, Uyghur rayonida nechche yüz ming Uyghurni yépiq lagérgha soluwalghan béyjing da'irilirining sehniside oyun qoyushning, bu exlaq ölchimige chüshmeydighanliqini ilgiri sürdi.

Melum bolushiche, dilber yunus, Uyghur xelqining béshigha kelgen eng éghir weqelerdin biri "5- Iyul weqesi" din kéyinmu, xitayda bir meydan oyun qoyghan idi.

Norwégiyede yashawatqan siyasiy közetküchi zümret xanim, xelq'ara xewerlerde qeshqerde 120 ming Uyghurning "Yépiq lagér" da ikenliki xewer qilin'ghandin kéyinmu dilber yunusning sehnidin waz kéchelmigenlikige, yeni rohiy keypiyatining buzulmighanliqigha heyran qalghanliqini bildürdi.

Zümret xanimning qarishiche, ene shu 120 ming Uyghurning arisida dilber yunusning uruq-tughqan we qolum-qoshnilirining bolmasliqi mumkin emes. Yene uning qarishiche, muhajirettiki Uyghurlar pütün küchi bilen "Yépiq terbiyelesh lagérliri" mesilisini dunyagha anglitishqa tirishiwatqan künlerde, Uyghurlar ichidin tonulghan bir kishining xitay hökümitining teshwiqatlirigha masliship, béyjing sehniside bexiraman oyun qoyushi, Uyghur weziyitining jiddiylikige qarita guman peyda qilidu.

Toluq bet