Uyghur élida 23 kishi xitayning olimpik mesh'elchisi dilnigar ilghamjan'gha torda pikir yazghanliqi üchün jazalan'ghan

Uyghur élida 23 neper Uyghur xitayning 4-féwral küni ‍ötküzülgen béyjing qishliq olimpikining échilish murasimida olimpik mesh'ili yandurghan Uyghur olimpik mesh'elchisi dilnigar ilhamjan'gha torda pikir yazghanliqi üchün jazalan'ghan.

Dunya Uyghur qurultiyining 10-féwral radiyomizning xitay bölümige bildürüshiche, 2-ayning 7-we 8-künliri qeshqer, aqsu qatarliq jaylarda dilnigar ilhamjan'gha torda pikir yazghan Uyghurlardin 23 kishige memuriy tutup turush jazasi bérilgen.

Xitay hökümiti Uyghurlargha “‍Irqiy qirghinchiliq” qilish bilen eyiblinip, nurghun döletler béyjing qishliq olimpikini bayqut qilghan bir waqitta, dilnigar ilhamjan isimlik bir Uyghur changghichi qizni yene bir xitay tenhetketchi qiz bilen birlikte qishliq olimpikning échilish murasimida mesh'el yandurushqa orunlashturup, xelq'arada qattiq inkas qozghighan. Amérikaning b d t da turushluq bash elchisi bilen aqsaray bayanatchisi xitayning bu herkitige inkas bildürüp: “Bu diqqetni Uyghur irqiy qirghinchiliqidin bashqa yaqqa burash herkiti” dep eyibligen idi.

Dunya Uyghur qurultiyining éytishiche, Uyghur élida nurghun Uyghur yashliri ündidar chembirikidiki her xil toplarda dilnigar ihamjan'gha baha bergen bolup, ularning bezi sözliri xitay da'irilirini bi'aram qilghan. Buning bilen qeshqer, aqsu, korla qatarliq jaylarda 20 din artuq kishige memuriy tutup turush jazasi bérilgen yaki jerimane qoyulghan. Dunya Uyghur qurultiyining bayanatchisi, bu hadisining 7-we 8-féwral künliri yüz bergenliki, jazalan'ghanlarning eng chongining 21 yash, eng kichikining 15 yashta ikenlikini bildürgen bolsimu, lékin ularning ismi we kimlikige a'it tepsilatlarni tilgha almighan.