Америка муавин президенти пәнс америка хәлқара диний әркинлик комитетиниң мәсуллирини қобул қилип, уйғур мәсилисини музакирә қилған

Мухбиримиз әркин
2019.05.13

Американиң муавин президенти майк пәнс 10‏-май күни америка хәлқара диний әркинлик комитетиниң мәсуллирини қобул қилип, уйғур вә роһинга мусулманлириниң мәсилисини музакирә қилған.

Музакиригә америка президентиниң дөләт хәвпсизлик мәслиһәтчиси, баш әлчи җон балтонму қатнашқан. Муавин президент пәнс 10‏-май күни тветирда елан қилған учурида, диний әркинлик комитетиниң роһинга вә уйғур мусулманлириниң тәқдирини алаһидә әскәрткәнликигә рәһмәт ейтип, трамп һөкүмитиниң һәр вақит диний әркинлик үчүн тик туридиғанлиқини билдүргән.

Америка хәлқара диний әркинлик комитетиниң шу күни елан қилған хәвиридә қәйт қилинишичә, йиғинда мәзкур комитетниң йеқинда елан қилинған 2019‏-йиллиқ доклати вә униңда оттуриға қоюлған тәклип-пикирләр музакирә қилинған. Йиғин өткүзүлгән дәл шу күни америка хәлқара диний әркинлик комитети баянат елан қилип, һөкүмәтниң уйғур мәсилисини америка-хитай сода сөһбити билән бирләштүрүшини тәләп қилған. Баянатта, “хитай һөкүмитиниң шинҗаңдики уйғур вә башқа мусулманлардин 3 милйондәк кишини тутқун қилғанлиқи” тәкитлинип, “хитайдики милйонлиған хәлқниң һаяти вә әркинлики өз һөкүмитиниң һуҗумиға учраватқан әһвалда биз диний әркинлик вә кишилик һоқуқни униң күнтәртипигә елип киришимиз керәк” дейилгән. Мәзкур комитет буниң сәл алдида елан қилған йиллиқ доклатида америка һөкүмитигә хитайни “диний әркинлики алаһидә көзитилидиған дөләтләр тизимлики” гә киргүзүшни, чен чүәнго қатарлиқ хитай әмәлдарлириға җаза қоюшни тәклип қилған иди. Лекин, хәлқара диний әркинлик комитетиниң йиғин һәққидики хәвиридә майк пәнсниң юқириқи тәклипкә қандақ инкас қайтурғанлиқи тилға елинмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.