Amérika bash elchisi tériy branstad tibet ziyaritide diniy erkinliktin endishe qiliwatqanliqini otturigha qoyghan

Muxbirimiz erkin
2019-05-27
Share

Ötken hepte tibet bilen chingxeydiki tibetler olturushluq rayonlarda ziyarette bolghan amerikaning xitayda turushluq bash elchisi tériy branstad tibetning diniy erkinlikidin endishe qiliwatqanliqini otturigha qoyghan.

Tériy branstad 19‏-maydin 25‏-mayghiche yuqiriqi rayonlarda bir heptilik ziyarette bolup, yerlik emeldarlar, diniy zatlar bilen körüshken hem tibetlerning tarixiy ibadetxanilarni ziyaret qilghan. Amérika tashqi ishlar ministirliqining 25‏-may küni élan qilghan uchurida qeyt qilinishiche, tériy branstatd ziyarette xitayni tibet rohaniy rehbiri dalay lama bilen "Heqiqiy di'alog" ötküzüshke, shuningdek tibetlerge diniy erkinlik bérishke chaqirghan.

Amérika tashqi ishlar ministirliqining uchurida "Bash elchi bizning uzundin buyanqi tibet aptonom rayonini ziyaret qilishqa yol qoyushning izchil bolmasliq mesilisidiki endishilirimizni otturigha qoydi. . . Shuningdek u yene xitay hökümitining tibet buddistlirining diniy pa'aliyetlerni teshkillishi we diniy ibaditini beja keltürüsh erkinlikige arilashqanliqigha qarita endishilirini ipadilidi," déyilgen.

Branstadning tibet ziyariti xitayning Uyghur rayonida 2 milyondek Uyghur, qazaq we bashqa türkiy xelqlerni yighiwélish lagérlirigha qamap, ularning diniy étiqadi, tili we medeniyitini cheklewatqan, Uyghur jem'iyitige qarita omumyüzlük teqibleshni yolgha qoyuwatqan bir mezgilde élip bérildi. Branstad tibettiki waqtida amerikaning béyjingdiki elchixanisi özining torida amérika tashqi ishlar ministirliqining xelq'ara diniy erkinlik elchisi sam browénbek bilen térrorluqqa qarshi turush boyiche alahide elchisi natan seylsning "Washin'gton pochtisi" gézitide élan qilin'ghan Uyghurlar heqqide maqalisini ulap élan qilghan. Maqalide "Xitayning Uyghurlargha qiliwatqini 'térrorluqqa qarshi küresh' emes, belki bir yirginchlik basturush" déyilgen idi.

Branstad amérika dölet mejlisi ötken yili 12‏-ayda "Tibet sayahet qanuni" ni maqullighandin béri tibette ziyarette bolghan tunji amérika emeldaridur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.