Русийә вә хитайдики диний әркинлик дәпсәндичилики трамп һөкүмитиниң әйиблишигә учриди

Мухбиримиз сада
2018-12-12
Елхәт
Пикир
Share
Принт

Трамп һөкүмәт хадимлири сәйшәнбә күни, йәни 11-өктәбир бир баянат елан қилип, хитай вә русийә қатарлиқ дөләтләрниң дөләт ичидә йүргүзүватқан системилиқ диний әркинлик дәпсәндичиликини қаттиқ әйиблигән.

«Хәвәрләр тори» ниң бу һәқтики хәвиригә қариғанда, америка дөләт ишлири министирлиқиниң хәлқара дини әркинликкә мәсул алаһидә әлчиси сәм бровнбәк юқириқи дөләтләрниң дәпсәндичилик қилмишини алаһидә қилип, «системилиқ, изчил давам қиливатқан вә хата болған диний әркинлик дәпсәндичилики» дәп изаһат бәргән. Арқидинла америка ташқи ишлар министири майк помпйо елан қилған өз хәлқиниң динға етиқад қилиш һоқуқиға дәхли-тәруз қиливатқан бир қисим дөләтләрни әйиблигән баянатиниму алаһидә тилға елип өткән.

Майк помпйо баянатида мунуларни билдүргән: «дунядики нурғун кишиләр өзиниң нормал диний етиқадида чиң туруп яшап келиватқан сәвәблик өзи туруватқан дөләтниң һөкүмити тәрипидин азаблашларға, тутқун қилинишқа, һәтта өлүм җазалириға һөкүм қилиниватиду. Америка бундақ бастурушларға қәтий қарап турмайду.»

Хәвәрдә йәнә кишилик һоқуқни көзитиш тәшкилати бу йил 9-айда елан қилған хитайниң уйғур диярида елип бериватқан зор көләмлик тутқун һәрикити вә шу йәрдики хәлқниң учраватқан зулуми һәққидики 117 бәтлик доклатму алаһидә орун тутқан.

Доклатта пүтүн уйғур дияридики 13 милйон түркий тиллиқ мусулманларниң «меңә ююш» қа дучар болуватқанлиқи, кишиләр ара нормал алақә вә диний паалийәтләрниң омумйүзлүк чәклимигә учраватқанлиқи шундақла хәлқара қанунға хилап болған зор көләмлик тәқиб системисиниң районда омумлишиши қатарлиқлар нуқтилиқ йорутуп берилгән.

Униңдин башқа йәнә 10-декабир күни америка дөләт мәҗлиси хитай ишлири комитети уйғур дияридин милйондин артуқ уйғурниң хитайниң аталмиш «қайта тәрбийәләп өзгәртиш» лагерлириға қамалғанлиқ мәсилиси һәққидә җиддий бир чақириқ елан қилған. Чақириқта нормал диний әркинлик паалийитиниң хитай һөкүмити үчүн бир җинайәт икәнлики әскәртилгән.

Пикирләр (0)
Share
Толуқ бәт