Rusiye we xitaydiki diniy erkinlik depsendichiliki tramp hökümitining eyiblishige uchridi

Muxbirimiz sada
2018-12-12
Élxet
Pikir
Share
Print

Tramp hökümet xadimliri seyshenbe küni, yeni 11-öktebir bir bayanat élan qilip, xitay we rusiye qatarliq döletlerning dölet ichide yürgüzüwatqan sistémiliq diniy erkinlik depsendichilikini qattiq eyibligen.

"Xewerler tori" ning bu heqtiki xewirige qarighanda, amérika dölet ishliri ministirliqining xelq'ara dini erkinlikke mes'ul alahide elchisi sem brownbek yuqiriqi döletlerning depsendichilik qilmishini alahide qilip, "Sistémiliq, izchil dawam qiliwatqan we xata bolghan diniy erkinlik depsendichiliki" dep izahat bergen. Arqidinla amérika tashqi ishlar ministiri mayk pompyo élan qilghan öz xelqining din'gha étiqad qilish hoquqigha dexli-teruz qiliwatqan bir qisim döletlerni eyibligen bayanatinimu alahide tilgha élip ötken.

Mayk pompyo bayanatida munularni bildürgen: "Dunyadiki nurghun kishiler özining normal diniy étiqadida ching turup yashap kéliwatqan seweblik özi turuwatqan döletning hökümiti teripidin azablashlargha, tutqun qilinishqa, hetta ölüm jazalirigha höküm qiliniwatidu. Amérika bundaq basturushlargha qet'iy qarap turmaydu."

Xewerde yene kishilik hoquqni közitish teshkilati bu yil 9-ayda élan qilghan xitayning Uyghur diyarida élip bériwatqan zor kölemlik tutqun herikiti we shu yerdiki xelqning uchrawatqan zulumi heqqidiki 117 betlik doklatmu alahide orun tutqan.

Doklatta pütün Uyghur diyaridiki 13 milyon türkiy tilliq musulmanlarning "Ménge yuyush" qa duchar boluwatqanliqi, kishiler ara normal alaqe we diniy pa'aliyetlerning omumyüzlük cheklimige uchrawatqanliqi shundaqla xelq'ara qanun'gha xilap bolghan zor kölemlik teqib sistémisining rayonda omumlishishi qatarliqlar nuqtiliq yorutup bérilgen.

Uningdin bashqa yene 10-dékabir küni amérika dölet mejlisi xitay ishliri komitéti Uyghur diyaridin milyondin artuq Uyghurning xitayning atalmish "Qayta terbiyelep özgertish" lagérlirigha qamalghanliq mesilisi heqqide jiddiy bir chaqiriq élan qilghan. Chaqiriqta normal diniy erkinlik pa'aliyitining xitay hökümiti üchün bir jinayet ikenliki eskertilgen.

Toluq bet