Хитай даирилири йәнә бир түркүм диний затларни “сиясий тәрбийәләш курси” ға йиғивалған

Хитай даирилири пәйшәнбә күни үрүмчидә “тәрбийәләш курси” ечип, йәнә бир түркүм диний затларға сиясий тәрбийәләш елип беришқа башлиған.

Даириләр бу қетимқи курста қанчилик диний затниң йиғивелинип тәрбийилинидиғанлиқини ашкарилимиған болсиму, әмма буниң бу йил ичидә ечилған 2‏-нөвәтлик курс икәнликини билдүргән.

“шинҗаң гезити” ниң хәвиридә ашкарилишичә, бу курсниң мәқсити диний затларни ши җинпиңниң “йеңи дәврдики җуңгочә сотсиялистик идийәси”, партийә 19‏-қурултийиниң роһий, хитай компартийәси мәркизий комитетиниң шинҗаңни идарә қилиш тоғрисидики баш нишани бойичә тәрбийәләп, уларниң “һәрикити билән идийәсини бирликкә кәлтүрүш, ашқунлуққа қарши туруш, шинҗаңниң иҗтимаий муқимлиқи вә әбәдий әминликигә төһпә қошуши” ни ишқа ашурушкән.

Диний затларниң мәзкур курси хитай мәркизи комитетиниң бу йил 4‏-айда тарқатқан ислам динини чәкләш һәққидики бир мәхпий һөҗҗити ашкариланған күни башланған. Хитай компартийәси мәркизи комитетиниң мәхпий һөҗҗитидә мәсчитләрниң қурулушини шәрқ қурулуш шәклигә өзгәртиш, әрәб тилини чәкләш, чәтәлдә дин оқуватқан мусулманларни контрол қилиш, диний кийим-кечәк, диний буюм, диний мурасим, диний тәблиғ, исламий идийәләрдә ғәйрий хитайлишишқа қарши туруш, исламий сәрмайини чәкләш қатарлиқлар тәкитләнгән иди.

“шинҗаң гезити” ниң тәкитлишичә, курсниң башлиниш мурасимида даириләр диний затларни тәрбийәләш “динни сотсиялизм билән маслишишқа йетәкләш, һәрқайси милләтләрниң өз-ара алақиси вә қошулуп кетишини күчәйтишниң муқәррәр тәлипи” дәп көрсәткән. Лекин уйғур кишилик һоқуқ тәшкилатлириниң илгири сүрүшичә, хитайниң диний затларға юқириқи сиясий тәрбийәләрни елип бериштики мәқсити уйғурларниң диний етиқадини аҗизлаштуруп, уларни тезрәк ассимилятсийә қилиш икән.”