Ju xeylün: “Dinni xitaylashturush yönilishide izchil ching turimiz”

Muxbirimiz erkin
2018-11-02
Share

Uyghur aptonom rayonluq partkom siyasiy-qanun komitétining sékrétari ju xeylün yéqinda chaqirilghan bir yighinda kompartiyening din'gha bolghan kontrolluqini kücheytish, dinni xitaylashturush yönilishide izchil ching turush kéreklikini tekitligen. Uning sözi b d t kishilik hoquq kéngishi 6‏-noyabir küni xitay kishilik hoquq xatirisini qerellik körüp chiqidighan bir mezgilge toghra keldi.

Xitay hökümiti lagérlarni “Kespiy terbiyelesh merkezliri” dep aqlisimu, lékin u xelq'araning yighiwélish lagérlirini taqap, uningdiki bir milyondek Uyghurni qoyup bérish, ularni özining diniy étiqadi, medeniyitidin waz kéchishke qistashtek jismaniy, rohiy jehettin xorlishini derhal toxtitip, ularning bu xorluq keltürüp chiqarghan jismaniy, rohiy ziyanlirini tölesh toghrisidiki küchlük bésimigha uchrimaqta.

Lékin, ju xeylün 31-öktebir ürümchide chaqirilghan birliksep, milliy-diniy ishlar we “Shinjang islam instituti” kadirlirigha achqan diniy xizmet yighinida, dinni xitaylashturushta dawamliq ching turushni tekitligen.

“Shinjang géziti” ning xewiridin ashkarilinishiche, ju xeylün yighinda: “Bashtin axiri shinjangning ijtima'iy muqimliqi we uzun muddetlik eminlikidin ibaret bash nishan'gha merkezliship, partiyening diniy xizmetke bolghan rehberlikini kücheytish, dölitimizning dinni xitaylashturush yönilishide chish turush, shinjang xizmitining bash nishanini emelge ashurushqa hesse qoshush kérek” dégen. U yene, islam dinining milletler ittipaqliqi we ijtima'iy inaqliqqa alaqidar telimliridin paydilinishni, diniy zatlarning xitayche öginishini ching tutushni telep qilghan.

Ju xeylün amérika dölet mejlisining 17 neper ezasining bu yil yazda prézidént trampqa yazghan mektupida, Uyghur rayonidiki éghir kishilik hoquq depsendichilikide mes'uliyiti bar, dep qaralghan emeldarlarning biri. Dölet mejlisi ezalirining mektupida chén chüen'go, ju xeylünni öz ichige alghan 8 neper xitay emeldarini jazalash telep qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet