Shi jinping xitay diplomatlirini “Diplomatik tömür armiye” bolushqa chaqirdi

Xitay hökümet taratqulirining xewerliridin qarighanda, shi jinping 29- dékabir küni xitayning herqaysi döletlerde turushluq elchilirini béyjinggha yighip yighin achqan we   yighinda xitay diplomatlirini “Diplomatik tömür armiye” bolushqa chaqirghan. U nutqida mundaq dégen:“Küresh qilishqa mahir bolup, dölet menpe'etining keskin qoghdighuchilirigha aylinishqa jür'et qilish kérek. … Küchlüklerge qarshi jeng élan qilishtin tep tartmaydighan, saghlam irade bilen döletning igilik hoquqi, bixeterliki we tereqqiyat menpe'etini qet'iy qoghdash kérek”.

Shi jinping shu kündiki sözide yene “Gherbning xitayni cheklesh we basturush urunushigha qarshi turush üchün xitayning xelq'aradiki tesir küchini ashurushning muhimliqini” mu tekitligen bolup, mundaq dégen:“Biz choqum chet'elliklerning tili we ularning métodlirini qollinip turup, xitay heqqidiki hékayilerni yaxshi sözlishimiz kérek”.

Roytérs agéntliqining xewiride déyilishiche, yuqiridiki bu sözler xitay diplomatliri 2020-yilidin buyan qollinip kelgen, emma bu yil xitay iqtisadidiki chékinish tüpeylidin chet'ellik meblegh salghuchilarni jelp qilish üchün sel ajizlap qalghan “Chil böre diplomatiyesi” dep atalghan qarshilishish uslubining qaytidin otturigha chiqiwatqanliqini körsitip béridiken.

Roytérs agéntliqining déyishiche, xitay dölet re'isi shi jinping yéqinda xitayning her besh yilda bir qétim nahayiti mexpiy shekilde ötküzülidighan merkiziy tashqi ishlar xizmet yighini ayaghlashqandin kéyin sözligen nutqidimu oxshashla “Gherbning ‛bozek qilishi‚ we ‛zomigerliki‚ ni eyiblep, diplomatiye emeldarlirini ‛jenggiwarliqini ilgiri sürüsh‚ ke chaqirghan” iken.