Японийәниң “доклам мәсилиси” дә һиндистанниң тәрипини елиши хитайни биарам қилған

Мухбиримиз қутлан
2017.08.20

Хитай билән һиндистан оттурисидики чегра талаш-тартиши күнсайин күчәйгән, бутан чеграсидики доклам райони тоқунушниң мәркизигә айланған бир пәйттә японийә оттуриға чиқип, “чегра мәсилиси” дә һиндистанниң тәрипини алған.

“һиндистан вақит гезити” ниң бу һәқтики хәвиригә қариғанда, өткән пәйшәнбә күни японийәниң һиндистанда турушлуқ баш әлчиси кәнҗи һираматсу “доклам мәсилиси” һәққидә инкас қайтуруп мундақ дегән: “хитай докламниң һазирқи әһвалини тақ тәрәплимилик издиниш арқилиқ өзгәртишкә урунуватиду.”

Японийәниң “доклам мәсилиси” дики инкаси хитайниң нервиси қозғап, уларни қаттиқ биарам қилған.

Шу күни хитай ташқи ишлар министирлиқиниң баянатчиси хва чүнйиң баянат берип мундақ дегән: “мән японийәниң һиндистанда турушлуқ баш әлчисиниң бу сөзлирини очуқ-ашкара һиндистанниң тәрипини алғанлиқ, дәп чүшинимән. Мән һираматсуниң доклам мәсилисидә пакитларни айдиңлаштурмай туруп, халиғанчә баһа бәрмәсликини тәвсийә қилимән.”

Хва чүнйиң йәнә мундақ дегән: “доңлаң (доклам) районида территорийә талаш-тартиши мәвҗут әмәс. Чегра аллиқачан икки дөләт тәрипидин етирап қилинип бекитилгән. Мәзкур районниң һазирқи мәвҗут һалитини өзгәртишкә уруниватқини җуңго әмәс, бәлки һиндистандур.”

Көзәткүчиләр, хитай, һиндистан билән болған чегра тоқунушида японийә тәрәпниң инкасиға интайин диққәт қилмақта, чүнки хитай өзиниң шәрқтики әң чоң дүшмини дәп һесаблаватқан японийәниң ғәрбтики йәнә бир рәқиби һиндистан билән чегра мәсилисидә бир яқидин баш чиқиришидин бәкму әнсирәйду, дәп һесаблимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.