Amérika dölet mejlisi: shinjang weziyitining nacharliship kétip barghanliqidin qattiq endishige chüshtuq

Muxbirimiz erkin
2018-01-08
Élxet
Pikir
Share
Print

Amérika dölet mejlisi xitay ishlar komitétining qosh re'isi, awam palata ezasi kristofir simit bilen kéngesh palata ezasi marku rubi'o düshenbe küni bayanat élan qilip, Uyghur élidiki kishilik hoquq krizisidin qattiq endishe qiliwatqanliqini bildürdi.

Bayanatta kéngesh palata ezasi marku rubi'o: "Xewerler shinjang Uyghur aptonom rayonluq partkom sékrétari chén chüen'goning qattiq qol siyaset yürgüzüp, minglighan yéngi amanliq xadimlirini qobul qilish, zor kölemlik yighilishlargha teshkillesh, puqralarning d n a, barmaq izi, köz, qan tipi ewrishkilirini élish arqiliq pütün rayonni bixeterlik torigha alghanliqi qeyt qilinmaqta" dep körsetti.

U yene, puqralar sewebsiz tutqun qiliniwatqanliqi, siyasiy terbiyelesh lagérlirining qurulup, zor kölemlik bixeterlik kaméraliri orunlashturulghanliqi, kündilik hayatning barliq sahelirining teqib astigha élin'ghanliqini bildürüp: "Kishilik hoquqqa xilapliq qilin'ghan bu éghir zulum radikaliqni kücheytish rolini oynaydu" dédi. Awam palata ezasi kristofir simit xitay hökümitining Uyghur rayonidiki éléktronluq teqib qilish we bixeterlik tori kishilik hoquq, dini erkinlik we kishilerning shexsi mexpiyetlikige qilin'ghan éghir buzghunchiliq ikenlikini eskertip: "Bu siyasetler pütünley selbiy netije béridu. U bixeterlikni qoghdash ornigha muqimsizliq we naraziliqni peyda qilidu" dep körsetti.

Kristofir simit we marku rubi'o bayanatida yene, xitay da'irilirining d u q ning aliy rehbiri rabiye qadir xanimning 30 dek perzent we newrilirini tutqun qilghanliqini tenqid qildi. Bayanatta, xitay da'irilirining rabiye qadir xanimdin öch élishqa urunuwatqanliqi eskertip, bu "Xitayning partiye we hökümetke qaritilghan tenqidlerni qorqutush, tutqun qilish yaki chet'eldiki pa'aliyetchilerning a'ile -tawabi'atlirigha tehdit sélish arqiliq jimiqturushqa urunuwatqanliqining yene bir ipadisi" dep körsitildi.

Bayanatta awam palata ezasi kristofir simit amérikining xitay bilen bolghan térrorluqqa qarshi turush hemkarliqida éhtiyat qilishi kéreklikini eskertip, xitayning "Tinch démokratik öktichilerni yaki dini erkinlik, yighilish we ipade erkinlikini basturushigha köz yummaydighanliqimiz yaki yol qoymaydighanliqimizni ipadilishimiz kérek" dégen.

Toluq bet