Amérika dölet mejlisining guwahliq yighinida Uyghurlar mesilisi otturigha qoyuldi

Muxbirimiz erkin
2018-04-27
Élxet
Pikir
Share
Print

Amérika dölet mejlisi we hökümitining xitay ishliri komitétining peyshenbe küni ötküzülgen bir guwahliq bérish yighinida xitayning yüzminglighan Uyghurni "Yépiq terbiyelesh lagérliri" gha qamash mesilisi otturigha qoyulup, amérikining xitaygha qarshi tedbir qollinishi telep qilindi.

Yighinda tam lantos kishilik hoquq we adalet fondining re'isi katérin lantos swét guwahliq bérip, xitayning "Yépiq terbiyelesh lagérliri" ni "2‏-Dunya urushidin kéyinki zamaniwi dewrde az sanliq milletlerni eng keng kölemlik qamash herikiti. Bu heqiqeten chöchüterlik derijide qorqunchluq" dédi. Katérin lantos swétning tekitlishiche, bu lagérlar téximu keng da'irilik bir mesilini yorutup béridiken.

U, kishilerning hazirgha qeder xitaygha hemme sahelerde yol qoyup kelgenliki, bu uning hazirqidek perwasiz halgha élip barghanliqini bildürüp, uninggha bundaq yol qoyushning "Exlaqiy jehettin xata bolupla qalmay, xeterlik" ikenlikini agahlandurdi.

"Digital diktatoriliq we söz erkinlikige bolghan xelq'araliq tehdit" namliq mezkur guwahliq bérish yighinini xitay ishliri komitétining qosh re'isi, awam palata ezasi kristofir simit bilen kéngesh palata ezasi marku rubi'o chaqirghan.

Yighinda yene erkinlik sariyining aliy derijilik tetqiqatchisi sara kuk, awstraliye charliz sturt uniwérsitétining proféssori, "Timtas ishghaliyet" namliq kitabning aptori kliw xamilton guwahliq bergen. Katérin lantos swét 19‏-aprél küni d u q ning aliy rehbiri rabiye qadir xanim bilen xitayning washin'gtondiki elchixanisi aldida axbarat yighini ötküzgen.

U axbarat yighinida xitayni "Yépiq terbiyelesh lagérliri" diki tutqunlarni derhal qoyup bérishke chaqirghan idi. U guwahliq bérish yighinida awam palata ezasi kristofir simitning axbarat yighini heqqidiki so'aligha jawab bergende yuqiriqi sözlerni qildi. U yene, "Eger biz xitaygha qarshi turmisaq, u kishilik hoquq, démokratiye, uchur erkinlikige alaqidar xelq'ara ölchemlerni ayaq-asti qilidu" dédi.

Toluq bet