Amérika dölet mejlisi Uyghur rayonidiki "Yighiwélish lagérliri" heqqide guwahliq bérish yighini chaqiridu

Muxbirimiz erkin
2018-07-20
Élxet
Pikir
Share
Print

Amérika dölet mejlisining bir komitéti 26‏-iyul küni guwahliq bérish yighini chaqirip, xitayning Uyghur rayonidiki "Yighiwélish lagérliri", teqiblesh we basturush qilmishliri heqqide mutexessisler we zhurnalistlardin guwahliq alidu.

Amérika awam palatasi xitay ishlar komitétining jüme küni élan qilishiche, "Shinjangdiki kishilik hoquq krizisi: teqiblesh, basturush we keng kölemlik tutqun qilish" namliq mezkur guwahliq bérish yighini Uyghurlarning künséri éghirlishiwatqan we nacharlishiwatqan kishilik hoquq weziyiti, xitay hökümitining Uyghur aptonom rayonida dunyadiki eng qattiq saqchi dölitini qurushi we amérika -xitay munasiwetliride bu mesilini qandaq hel qilishqa da'ir siyasetlerni otturigha qoyushni meqset qilghaniken.

Mezkur komitét bayanatida, "Uyghurlar we shinjang Uyghur aptonom rayonidiki bashqa musulman milletler qanunsiz tutqun qilinish, ten jazasi, diniy erkinlik we medeniyiti qorqunchluq cheklimige we digital teqibleshke uchrap, yüz tonush apparati ornitish, qol téléfon tekshürüsh, DNA ewrishkilirini yighish qatarliq saqchilarning keng kölemlik nazariti arqiliq ularning kündilik hayatining barliq sahesi nazaret astigha élindi" déyilgen.

Bayanatta yene, bir milyondek kishining tutqun qilinip, atalmish "Qayta-terbiyelesh lagérliri" gha solan'ghanliqigha da'ir ishenchlik melumatlarning barliqi, bu lagérlargha solan'ghanlarning ichide erkin asiya radiyosi Uyghur bölümining muxbirliri we tonulghan Uyghur kishilik hoquq pa'aliyetchisi rabiye qadirning a'ile ezaliriningmu barliqi bildürülgen.

Amérika awam palatasi xitay ishlar komitétining bayanatida körsitilishiche, guwahliq bérish yighinida erkin asiya radiyosining gülchéhre xoja, amérika loyola uniwérsitétining dotsénti rayan tum, "Xitay arxipi" namliq tor bétining aliy muherriri, amérika dölet ishlar ministirliqining sabiq analizchisi jésika batké guwahliq béridiken.

Toluq bet