Kishilik hoquq teshkilatliri dolqun eysaning b d t yighin zalidin chiqiriwétilishige birleshme inkas qayturdi

Muxbirimiz qutlan
2017-05-08
Élxet
Pikir
Share
Print

Bügün "Kishilik hoquqni közitish teshkilati", "Az sanliqlar hoquqi guruppisi" we "Wakaletsiz milletler teshkilati" qatarliq xelq'aradiki kishilik hoquq teshkilatliri birleshme bayanat élan qilip, dolqun eysaning nyuyorktiki b d t yighin meydanidin chiqiriwétilishige qarita naraziliq bildürdi.

Radiyomizning igilishiche, teklipke bina'en b d t ning nyuyorktiki bash orginida ötküzülgen "Yerlik milletlerning menggülük munbiri" de Uyghur mesilisini anglitishqa kelgen dolqun eysa 26-aprél küni yighin meydanidin mejburiy halda sirtqa chiqiriwétilgen.

Uzun yillardin buyan Uyghur dewasi yolida aktip pa'aliyet élip bériwatqan, 2016-yili 30-aprélda amérikining "Truman-régan erkinlik médali" gha érishken, nöwette dunya Uyghur qurultiyining bash katipliq wezipisini ötewatqan dolqun eysaning xitayning bésimi arqisida b d t ning nyuyorktiki yighin zalidin chiqiriwétilishi dunya jama'etchilikide küchlük inkas peyda qildi.

Dolqun eysaning radi'omizgha bildürüshiche, nyoyorktiki b d t bash shtabining bixeterlik xadimliri yéterlik chüshendürüsh yaki seweb körsetmigen ehwalda dolqun eysani yighin meydanidin ayrilishqa mejbur qilghan.

Gerche wakaletsiz milletler teshkilati bilen xeter astidiki milletler teshkilati bu heqte tirishchanliq körsetken bolsimu, emma ikki kündin kéyin, yeni 28-aprél küni dolqun eysaning b d t yighin meydanigha qayta kirish urunushi yene ret qilin'ghan.

Dolqun eysaning b d t orginida bundaq ehwalgha uchrishi ikkinchi qétim bolup, u buningdin 10 yil burun, yeni 2007-yili xitayning küchlük bésimi arqisida b d t ning jenwediki yighin meydanidin ayrilishqa mejbur bolghan idi.

Bügünki birleshme bayanatta wakaletsiz milletler teshkilatining bash katipi marino busdachining söz neqil keltürülüp mundaq déyilgen: "Yerlik milletlerning awazi üchün orun we purset bérilgen b d t munbiride bundaq bir weqening qayta tekrarlinishi kishini heqiqetenmu endishige salidu."

Dolqun eysa bu heqte radi'omizgha bergen bayanatida mundaq dédi: "Méning yighin zalidin chiqiriwétilishim xitayning bésimi arqisida yüz bergen bir waqitliq hadise. Bu hergizmu Uyghur mesilisining b d t munbiride anglitilishining axirlashqanliqidin dérek bermeydu."

Toluq bet