Доналд трамп юқири баҗ арқилиқ хитай карханилирини мексикадин сиқип чиқармақчи болған

Вашингтондин мухбиримиз җәвлан тәйярлиди
2025.01.15

Америка дөләтлик радийо ширкити (NBC) ниң 15-январ елан қилған хәвиригә қариғанда, пирезидент доналд трамп келәр һәптә вәзипигә олтуруш биләнла, юқири таможна беҗи сияситини иҗра қилидиғанлиқини, шу арқилиқ америка карханилирини гүлләндүрүп, иш орнини көпәйтидиғанлиқини билдүргән.

Доналд трамп биринчи қетимлиқ вәзипә өтәш мәзгилидә хитайдин нәччә он милярд доллар таможна беҗи алғандин кейин, көплигән хитай карханилири завутлирини мексикаға йөткәш арқилиқ, американиң таможна беҗидин қутулған. Мексиканиң америкаға йеқин җайлирида хитайниң көплигән санаәт райони, аптомобил вә юқири техника мәһсулатлири завутлири қурулған, 7000 иш орни яритилған. 2023-Йили, хитай ширкәтлири 2021-йилдин буян мексикаға салған мәблиғиниң җәмий 4 милярд долларға йеқин болғанлиқини елан қилған болуп, 2024-йилниң алдинқи йеримда буниңға йәнә, 1.4 Милярд доллар қошулғанлиқи хатириләнгән; бу хитайниң 2014-йилдин 2020-йилғичә мексикаға салған мәблиғиниң 4 һәссисигә тоғра кәлгән.

Хәвәрдә ейтилишичә, америка билән мексика арисида сода келишими болуп, америкаға киргән мексика маллиридин таможна беҗи елинмайдикән. Әмма доналд трамп бу һәқтә мексикани агаһландуруп, келәр һәптә вәзипигә олтурған биринчи күнила, мексикадин киридиған малларға таможна беҗи қойидиғанлиқини җакарлиған. Хитай һөкүмити һазир мексикадики хитай ширкәтлириниң тәқдиридин әнсирәватқан болуп, американиң йеқинда 37 хитай ширкитигә ембарго қоюши хитайға техиму еғир зәрбә болған. Көзәтчиләрниң қаришичә, хитайға қариғанда мексика америка билән сода җәһәттә қайта сөһбәтлишишкә әң лайиқ икән.

Хәвәрдә дейилишичә, доналд трамп әгәр мексикаға таможна беҗи қойса, “америка-мексика-канада сода келишими” гә хилаплиқ қилған болидикән; бир қатар қануний тосалғуларға, шундақла қарши тәрәпниңму юқири таможна беҗи қоюшиға учрайдикән һәмдә буниңдин америка ширкәтлири зиян тартидикән. Әмма пул-муамилә базирида чоң давалғуш болмайдикән. Пәқәт аптомобилдин тартип йемәк-ичмәк маллириниң баһасида өрләш болидикән. Мексикадин һәйдилиш хәвпигә дуч кәлгән хитай ширкәтлириниң америкада завут қурушиму қийин болуп, чиқим юқири, әмгәк күчи қиммәт болидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.