BBC: "Amérikiliq meslihetchi xitayning dunya soda teshkilatidin chiqiriwétilishi kéreklikini isharet qildi

Muxbirimiz shöhret hoshur
2018-11-21
Share

Amérikining soda wakaletchilik ishxanisi seyshenbe küni xitayning tijariy ijra'atliri heqqide bir doklat élan qilghan. Doklatta xitay terepning soda ishlirida téxnika oghrilash we jasusluq qilish qatarliq qanunsiz qilmishlirini yenila dawamlashturuwatqanliqi otturigha qoyulghan.

Doklatta yene xitayning nöwette chet'el shirketliri bilen shériklishishtiki bir qisim orunsiz telepliridin waz kechken we buni omumlashturush üchün bir qatar wedilerni bergen bolsimu, lékin xitayning bu wedilirige ishinishke bolmaydighanliqi eskertilgen. Doklatta yene mezkur wakaletchilikning bu yil axirida échilidighan G-20 yighinigha qeder xitayning soda ijra'atlirida közge körünerlik özgirish peyda qilish üchün kücheydighanliqi tilgha élin'ghan.

Amérika prézidénti donald tramning iqtisadiy meslihetchiler kéngishining bashliqi keywén hassét ependi bügün BBC muxbiri bilen ötküzgen söhbitide amérikining xitay üstidin dunya soda teshkilatigha erz sunsa utidighanliqini, emma erz délosining bir terep qilinishi üchün 5-6 yil waqit ketkechke bu erzde qazinilidighan paydining ziyanni qaplap bolalmaydighanliqini eskertken. Shunga u dunya soda teshkilatining teshkilat qa'idisige boysunmaydighan we iqtisadiy jazaning töwenliki seweblik jazadin qorqmaydighan döletlerge qarita bir tedbir qollinishi kéreklikini tekitligen.

BBC Ning bügün bu heqte bergen xewiride mezkur meslihetchining bu sözliri "Xitayni dunya soda teshkilatidin chiqiriwétish kéreklikining bir ishariti" déyilmekte.

Amérika bilen xitay arisidiki soda urushi dawam qiliwatqan bu mezgilde ikki terepning herbiy sahediki talash-tartishlirimu dawam qilmaqta. Amérikining B-52 tipliq ikki ayropilani igilik hoquqi talash-tartishtiki jenubi déngizgha qonup uzun ötmey, yeni charshenbe küni amérikining bir awi'amatkisi xongkong portida toxtighan. Amérika déngiz armiye qomandanliridin karl tomas bügün muxbirlargha qilghan sözide xitay herbiy paraxotining bu yil 9‏-ayda jenubi déngizda ötküzgen xataliqini yene tekrarlimasliqini ümid qilidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet