Д у қ б д т ни уйғурларға қаритилған ирқий қирғинчилиқни ахирлаштуруш үчүн һәрикәткә өтүшкә чақирди

Мухбиримиз җүмә
2020-10-25
Share
BDT-belgisi.jpg Б д т бәлгиси чүшүрүлгән сәһнә арқа көрүнүши. Б д т баш штаби. 2013-Йили 3-сентәбир.
AP Photo/Bebeto Matthews

Дуня уйғур қурултийи бирләшкән дөләтләр тәшкилатиниң 75-йиллиқи мунасивити билән баянат елан қилип, уларни уйғурларға қаритилған ирқий қирғинчилиқни ахирлаштуруш үчүн һәрикәткә өтүшкә чақирди.

Дуня уйғур қурултийи баянатида бирләшкән дөләтләр тәшкилати низамнамисиниң 75 йил аввалқи бүгүнки күндә йолға қоюлғанлиқини, буниң билән дуня миқясидики дөләтләрниң бирлишип тинчлиқ вә бихәтәрликни қоғдаш вә дуняви инсанийәт җәмийитиниң турмуш сәвийәсини юқири көтүрүш вәдисини бәргәнликини билдүрди.

Д у қ баянатида мунда деди: "бу вәдиләргә қаримай, б д т өзиниң қуруш принсипида давамлиқ көрүнәрлик хирисларға дуч кәлмәктә. Болупму, хитай һөкүмити тәрипидин инсанийәткә қарши елип берилған җинайәтләр вә уйғур хәлқигә қаритилған ирқий қирғинчилиқ тарихий күн, дәп қаралған у күнгә қараңғу көләңгә ташлап турмақта. Б д т ниң 75 йиллиқини хатириләш мунасивити билән, дуня уйғур қурултийи б д т вә униңға әза дөләтләрни уйғур кризисини әһмийәтлик һалда һәл қилишқа вә хитай һөкүмитини җинайәтлири сәвәблик җавабкарлиққа тартишқа чақириду."

Баянатта, хитай һөкүмитиниң 2017-йилидин башлап милйонлиған уйғур вә башқа түркий мусулманлирини җаза лагерлириға ташлиғанлиқи, уларниң лагерларда қийнаш, җинсий хорлаш вә мәҗбурий әмгәк қатарлиқ зулумларға муптила қилинғанлиқи, хитай һөкүмитиниң мәсчит, қәбристанлиқларни вәйран қилғанлиқи, уйғур тилини чәклигәнлики вә уйғур балилирини аилисидин айриғанлиқи, униңдин башқа уйғурларниң көпийиш нисбитини төвәнлитиш пиланини йолға қоюп, мәҗбурий бала чүшүрүш, кәң көләмдә туғмас қилиш вә туғут чәкләш тәдбирлирини қолланғанлиқи оттуриға қоюлди.

Баянатта йәнә, хитайниң "б д т дики орни вә тәсири вә униң кишилик һоқуқ механизми б д т ниң ядролуқ принсип вә қиммәт қаришини йоқитиветидиған" лиқи көрситилди. 

Баянат ахирида мунда дейилди: "хитай һөкүмити уйғурларға қаритилған ирқий қирғинчилиқни давам қиливатқан шараитта, хәлқара җәмийәт йәнә қарап турушни давамлаштурмаслиқи керәк. Х к п б д т кишилик һоқуқ системисини актиплиқ билән контрол қилиш вә бузуш билән бир вақитта, шәрқий түркистандики уйғур хәлқиниң негизлик кишилик һоқуқи вә әркинликигә системилиқ дәхли-тәруз қилди. Бу б д т ға һөрмәт вә баравәрлик принсипи асасида қурулған тәшкилат болуш сүпити билән әң еғир тәһдитләрни пәйдә қилмақта. Бирләшкән дөләтләр тәшкилати 75 йиллиқида өзиниң тарихиға пәхирлиниш туйғусида нәзәр селиватқан болсиму, әмма өзиниң даимлиқ мәсулийитини унтуп қалмаслиқи керәк. Әгәр һазир уйғур кризисини тохтитиш үчүн мувапиқ тәдбир қоллинилмиса, бу униң хатирисидики өчмәс дағ сүпитидә әстә сақлиниду."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт