D u q kanada bash ministirigha yollighan mektupini élan qildi

Muxbirimiz eziz
2017-12-05
Élxet
Pikir
Share
Print

Kanada bash ministiri jastin trudowning 4-dékabirdiki xitay ziyaritidin ilgiri bash shtabi gérmaniyediki dunya Uyghur qurultiyi uninggha bir parche mektup yollighan.

Xette kanada hökümitining xitaydiki insan heqlirini depsende qilish mesiliside süküt qilmasliqi, eksiche bu mesilide algha qarap dadilliq bilen "Diplomatik qedem" élishi telep qilin'ghan.

Mezkur mektupning toluq tékisti dunya Uyghur qurultiyining tor bétide 5-dékabir küni élan qilindi. Xette Uyghurlar diyaridiki barghanséri yamanlishiwatqan kishilik hoquq mesililiri, jümlidin saqchilar qoshunining zoriyishi, yuqiri pen-téxnikiliq nazaretning yolgha qoyulushi, terbiyelesh merkezlirining köplep échiliwatqanliqi, diniy étiqadning we Uyghur tilining qattiq teqib qilinishi qatarliq mesililer tilgha élin'ghan.

Mektupta "Sherqiy türkistandiki weziyet hazir kishilerning sewri qachisi tolghan bir haletke keldi" dep körsitilidu hemde buninggha misal teriqiside xitay türmisidiki ilham toxti mesilisi tilgha élinidu.

Mektupta xitayda söz erkinlikining bolmasliqi sewebidin Uyghurlarning bu mesililerni otturigha qoyush imkaniyiti yoqluqi, shuning üchün bash ministirning xitay ziyariti jeryanida bu mesililerni otturigha qoyushi telep qilin'ghan.

Halbuki 5-öktebir küni kanada bash ministirining xitay sepiride ikki terep otturisidiki erkin soda kélishimi imzalash arzusining köpükke aylan'ghanliqi melum boldi. Herqaysi axbarat wasitiliri bu qétimqi söhbetning axirqi hésabta ortaq kélishim hasil qilalmasliqidiki sewebler qatarida jastin trudowning xitaydiki kishilik hoquq depsendichiliki mesilisi, bolupmu xitay türmisidiki kanada puqrasi hüseyin jélil mesilisini alahide tilgha alghanliqini tekitleydu.

Jastin trodowmu bügün muxbirlargha qilghan sözide özining xitay rehberliri bilen bolghan söhbette mushu mesililerni otturigha qoyghanliqini éytti.

Toluq bet