Дуня уйғур қурултийи: «қирғизистанлиқ кишилик һоқуқ паалийәтчиси камил рузийефниң әһвалидин қаттиқ әндишә қиливатимиз»

Мухбиримиз әркин
2020-06-12
Елхәт
Пикир
Share
Принт

Дуня уйғур қурултийи 11-июн күни баянат елан қилип, қирғизистанлиқ уйғур кишилик һоқуқ паалийәтчиси камил рузийефниң әһвалидин қаттиқ әндишә қиливатқанлиқини билдүрди. Дуня уйғур қурултийи баянатта, қирғизистан даирилирини «камил рузийефниң һоқуқиға һөрмәт қилишқа, униңға қаритилған хата әйибләшни бикар қилишқа вә уни дәрһал қоюп беришкә» чақирған. Камил рузийеф қирғизистанниң иссиқкөл районлуқ дөләт бихәтәрлик органлири тәрипидин 29-май күни қарақол шәһиридә тутқун қилинип, 31-май күни униңға аилидә нәзәрбәнд қилиш җазаси берилгән.

Дуня уйғур қурултийиниң билдүрүшичә, камил рузийеф уйғур кишилик һоқуқ мәсилисидә актип болуп, у «вәнтус кишилик һоқуқ тәшкилати» рәһбири болуш сүпитидә нуқтилиқ қирғизистандики кишилик һоқуқ дәпсәндичиликигә болупму, тән җазасиға қарши туруш, аилә ичи зораванлиқ вәқәлиригә қануни ярдәм бериш паалийәтлиридә болуп кәлгән икән. У илгири өзиниң паалийити сәвәблик қирғиз бихәтәрлик хадиминиң паракәндичилики вә тәһдитигә учриғанлиқини билдүргән.

Камил рузийеф йеқинда қирғиз бихәтәрлик хадими, қирғизистан дөләт бихәтәрлик идариси вә қирғизистан йәрлик тәптиш мәһкимиси үстидин сотқа әрз сунған. У қирғизистан йәрлик тәптиш мәһкимисини өзиниң тәһдиткә учриғанлиқиға даир әрзини тәкшүрмәслик билән әйиблигән. Баянатта дуня уйғур қурултийиниң рәиси долқун әйса қирғизистан даирилирини кишилик һоқуқ паалийәтчилиридин өч алмаслиққа чақирип, «рузийефниң хизмити қирғиз хәлқиниң турмушини яхшилашқа муһим төһпә қошмақта. Қирғизистан һөкүмити униң авазини аңлиши, уни җимиқтурушқа урунмаслиқи керәк» дегән.

Пикирләр (0)
Share
Толуқ бәт